9 წლის გოგონას გარდაცვალების საქმეში ბრალდებულს პატიმრობა შეუფარდეს

ბრალდებულის აღკვეთის ღონისძიებაზე სასამართლომ 3 დეკემბერს იმსჯელა. ბრალდებულ ა. ჩ.–ს ადვოკატმა ნუგზარ სამარჯიშვილმა, აღკვეთის ღონისძიებად გირაოს შეფარდებაზე იშუამდგომლა.

როგორც მან განმარტა, ბრალდებული დანაშაულს აღიარებს და შემთხვევის შემდეგ სამართლდამცველებს არ მიმალვია, ამიტომ ითხოვა მისი დაცვის ქვეშ მყოფის გირაოს სანაცვლოდ გათავისუფლება: „ბრალდებული ნანობს დანაშაულს და გამოძიებას არაფერში ედავება. გვინდოდა სასამართლოს მისი ქონება შეეფასებინა და გირაო ამის მიხედვით შეეფარდებინა“.

მოსამართლე შალვა მჭედლიშვილმა ადვოკატის შუამდგომლობა არ დააკმაყოფილა და ბრალდებულს აღკვეთის ღონისძიებად პატიმრობა შეუფარდა.

დაცვის მხარე მოსამართლის გადაწყვეტილების გასაჩივრებას არ აპირებს.

შეგახსენებთ, რომ სოფელ ბოლაჯურში ავტოისაგზაო შემთხვევა 1 დეკემბერს მოხდა. ალკოჰოლის ზემოქმედების ქვეშ მყოფი 29 წლის მამაკაცი, სკოლიდან მომავალ 9 წლის გოგონას დაეჯახა. შემთხვევის შედეგად გოგონა ადგილზე გარდაიცვალა.

შინაგან საქმეთა სამინისტროს ინფორმაციით, საქმეზე გამოძიება სისხლის სამართლის კოდექსის 276-ე მუხლის მე-5 ნაწილით მიმდინარეობს. აღნიშნული მუხლი გულისხმობს ტრანსპორტის მოძრაობის უსაფრთხოების ან ექსპლუატაციის წესის დარღვევას, რამაც გამოიწვია ადამიანის სიცოცხლის მოსპობა. დანაშაული ისჯება თავისუფლების აღკვეთით ვადით ოთხიდან შვიდ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.

[ლუბა გიორგაძე, ადიგენი]