ავტოსაგზაო შემთხვევის შედაგად დაზარალებული გოგონა თბილისში გადაჰყავთ

როგორც კლინიკა „იმედში“ განგვიმარტეს, გოგონას მდგომარეობა საშუალო სიმძიმისაა, თუმცა დამატებითი გამოკვლევების ჩატარება აუცილებელია.

„ველოდებით კატასტროფის ბრიგადას. პაციენტს ტვინის შერყევა აქვს, სტაციონარული მკურნალობა და ტომოგრაფიის გადაღება სჭირდება, რაც ჩვენ არ გვაქვს“, – განგვიცხადეს კლინიკაში.

შეგახსენებთ, რომ ახალციხეში, მეხუთე საჯარო სკოლასთან დღეს, 17 თებერვალს ქვეითადმოსიარულე 7 წლის გოგონას „მერსედესი“ მარკის ავტომობილი დაეჯახა. დაზარალებული სასწრაფო სამედიცინო დახმარების ბრიგადამ კლინიკა „იმედში“ გადაიყვანა.

როგორც „სამხრეთის კარიბჭეს“ შინაგან საქმეთა სამინისტროშ განუცხადეს, გოგონა მსუბუქად დაშავდა. მომხდარზე ძიება სისხლის სამართლის კოდქსის 276–ე მუხლის პირველი ნაწილით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.

[თინათინ ზაზაძე, ახალციხე]