ვისაც აივანზე ყვავილების დარგვა სურს, მიწასა და ყვავილებს ახალციხის მერია მისცემს

„ფიჭვის ნერგი 1.5 მეტრის სიგრძის მაინც იქნება და მის გახარებაზეც ვიზრუნებთ“, – განაცხადა ვლადიმერ ზედგინიძემ.

მისივე თქმით, ქალაქის მეტად გალამაზებისთვის ცენტრალური ქუჩების ტროტუარებზე სპეციალურ ყუთებში ყვავილები დაირგვება. იმ მცხოვრებლებს, რომლებიც ყვავილების დარგვას საკუთარ აივანზე მოისურვებენ, ყვავილსა და მიწას ახალციხის მერია მისცემს, კალათის ყიდვაზე კი, რომელშიც ყვავლებს ჩარგავენ, თავად მოუწევთ ზრუნვა.

აღნიშნულის შესახებ ახალციხის მერმა ვლადიმერ ზედგინიძემ გუშინ, 17 იანვარს არასათავრობო სექტორის წარმომადგენლებთან და მოქალაქეებთან შეხვედრის დროს ისაუბრა.

როგორც ვლადიმერ ზედგინიძემ განაცხადა, 2017 წელი მთავრობის მიერ ტურისტულ წლად არის გამოცხადებული და შესაძლებლობებიდან გამომდინარე, ქალაქის ინფრასტრუქტურის მოწესრიგება და გალამაზება ძალიან მნიშვნელოვანია.

„უნდა ვიზრუნოთ ტურიზმის განვითარებასა და ინფრასტრუქტურის მოწყობაზე. სხვა რესურსი ჯერჯერობით არ გაგავაჩნია. თამარაშვილის ქუჩაზე ფასადურია მართალია, მაგრამ რეაბილიტაცია მაინც მოვახდინეთ“, – განაცხადა ქალაქის მერმა.

[თინათინ ზაზაძე, ახალციხე]