ახალციხეში 32 საგზაო ნიშანი მოიხსნება

„შემოვიარეთ ქუჩები, როგორც საახალწლოდ ისეა მორთული შეუსაბამო საგზაო ნიშნებით. ჩვენ მივიღეთ გადაწყვეტილება, მოვხსნათ ის ნიშნები, რომლებიც არამიზნობრივადაა დაყენებული“, – განაცხადა ახალციხის მერმა ვლადიმერ ზედგინიძემ.

მისივე თქმით, ქალაქის რამდენიმე ქუჩაზე მოეწყობა ფასიანი პარკინგი და შეიზღუდება მოძრაობა: „ქალაქის რამდენიმე ქუჩაზე მოვაწყობთ ფასიან გაჩერებებს, არა იმიტომ, რომ შემოსავალს ვეძებთ, არამედ ამას მოსახლეობის მოთხოვნით ვაკეთებთ. მათ ურჩევნიათ თანხა გადაიხადონ, ოღონდ მანქანის გაჩერება შეძლონ“.

შეგახსენებთ, რომ ფასიან პარკირებაზე ახალციხის მერია 2015 წელსაც საუბრობდა, თუმცა ამ დრომდე არ არის გადაწყვეტილი ზუსტად რომელ ქუჩაზე, რა მონაკვეთი იქნება ფასიანი.

[თინათინ ზაზაძე, ახალციხე]