ლიფტები, რომელიც მერიის ბიუჯეტში ჯერ ვერ მოხვდა

გალინა ხვიჩია მეორე წელია ქალაქ ახალციხის მერიის ბიუჯეტის პროექტის განხილვას ესწრება და ერთიდაიგივე პრობლემის მოგვარებას ითხოვს, თუმცა უშედეგოდ. მისი ერთადერთი თხოვნა, რვასართულიან კორპუსის სადარბაზოებში ლიფტების დამონტაჟებაა.

„რა გახდა სამი ლიფტი. იმ დღეს სადარბაზოში ყვირილი მომესმა, გავედი, ერთი მოხუცი ქალბატონი იყო, გზას ვეღარ აგრძელებდა. სკამი გავუტანე, რომ სული მოეთქვა“, – განაცხადა ბიუჯეტის განხილვისას თამარაშვილის ქუჩაზე, რვასართულიან კორპუსში მცხოვრებმა გალინა ხვიჩიამ.



ლიფტების საკითხთან კითხვები აქვს საკრებულოს დეპუტატს მამუკა მიქელაძესაც. როგორც მან ბიუეჯტის განხილვისას განაცხადა, გასულ წელს 80.000 ლარი იყო გათვალისწინებული ლიფტების დასამონტაჟებლად, თუმცა, მისი არაერთი მცდელობის მიუხედავად, თანხა სხვა მიმართულებით გამოიყენეს: „პასუხი იყო, რომ ეს არის დიდი პროექტი. თუ არ იყო საკმარისი თანხა, ერთ სადარბაზოში მაინც გაგვეკეთებინა, იქ, სადაც მეტი ხანდაზმული ცხოვრობს. ეს არის ჩემი ტკივილი“.

ბიუჯეტის განხილივისას ადგილობრივთვი თვითმმართველობის ხელმძღვანელ პირებს არ უსაუბრიათ გამოიყოფა თუ არა ახალი ლიფტების შესაძენად თანხა. რა გადაწყვეტილებას მიიღებს ახალციხის მერია, ამ დროისთვის უცნობია.

თუმცა ქალაქის მერმა ვლადიმერ ზედგინიძემ განაცხადა, რომ აღნიშნული საკითხის გარდა პრობლემაა შეზღუდული შესაძლებლობების მქონე პირების გადაადგილება, რომლებიც მაღალ სართულებზე ცხოვრობენ.

„ჩვენ გვყავს შშმ პირები, რომლებიც V-VI სართულებზე ცხოვრობენ. ჩვენ მათზე აუცილებლად უნდა ვიზრუნოთ. როგორც გავიგე, 3–5 ათას ლარამდე ჯება ლიფტების გაკეთება“, – განაცხადა ვლადიმერ ზედგინიძემ.

რაც შეეხება რვასართულიანი კორპუსის ლიფტების საკითხს, ზედგინიძის განმარტებით ისინი რეაბილიტაციას არ დაექვემდებარება და მთლიანად ახალია გასაკეთებელი.

[თინათინ ზაზაძე, ახალციხე]