2017 წელს ახალციხეში ენერგოეფექტური ბაღი აღარ აშენდება

ენერგოეფექტური ბაღის პროექტი

აღნიშნულის შესახებ არასამთავრობო ორგანიზაციების და მედიის წარმომადგენლებს დღეს, 17 იანვარს ქალაქის მერმა ვლადიმერ ზედგინიძემ განუცხადა.

„არ არის მაინცდამაინც ფუფუნების წელი. ეს საკითხი ამოღებული იქნა. პროექტი ნაყიდი გვაქვს, მაგრამ გადაიდო განხორციელება“, – განაცხადა ახალციხის მერმა ვლადიმერ ზედგინიძემ.

მისივე თქმით, აღნიშნული ბაღის მშენებლობა ორ წელზე იყო გათვლილი. 4 500 000 ლარიანი პროექტიდან, 3 500 000 ლარი სახელმწიფოსგან უნდა მიეღოთ, დარჩენილ თანხას კი ადგილობრივი ბიუჯეტიდან დაამატებდნენ.

ახალციხეში ე.წ „ჯაყელების“ ბაღის ადგილზე, ახალი ენერგოეფექტურის ბაღის მშენებლობის შესახებ ორი წელია საუბარია. გასულ წელს ადგილობრივმა თვითმმართველობამ ენერგოეფექტური ბაღის პროექტიც შეადგინა. ტენდერში გამარჯვებულმა კომპანიამ "Dagenbach Landscapes“–მა სამუშაოები 40 000 ლარად შეასრულა. პროქტის პრეზენტაცია ახალციხეში 2016 წლის 7 ივნისს გაიმართა .

საზოგადოებრივი განვითრების ახალციხის ცენტრის დირექტორი ნუგზარ თათეშვილი იმედოვნებს, რომ დაწყებული საქმე ბოლომდე მივა და ახალციხეში ენერგოეფექტური ბაღი მაინც აშენდება.

„პროექტი მზადაა, იმის გამო, რომ ბიუჯეტში სათანადო სახსრები ვერ გამოინახა დროებით შეჩერდა. ამ პროექტს არავინ უგულებელყოფს და მაინც გაკეთდება. უბრალოდ დროში გადაინაცვლა, როგორც კი სათანადო ფინანსები და დონორი გამოჩნდება, მშენებლობა დაიწყება“, – ამბობს ნუგზარ თათეშვილი.

მანამდე, ვიდრე ახალციხის მერია ფინანსების ძიებაში იქნება, N2 ბაგა–ბაღის და N 4 ბაგა–ბაღის აღსაზრდელებს ისევ გაურემონტებელ შენობაში სწავლა და ღუმელებით გათბობა მოუწევთ.

N2 ბაგა–ბაღში, რომელიც ავარიულია, სასწავლებლად საბარგო სადგურის დასახლებიდანაც დადიან. ვლადიმერ ზედგინიძის განმარტებით, შესაძლოა საბარგო სადგურზე ძველი ბაგა–ბაღის შენობის აღდგენა მოხდეს, თუმცა ჯერ ამაზე კონკრეტული საუბარი არ ყოფილა და არც ბიუჯეტშია ასახული მისი რეაბილიტაცია.

„შენობის ძირითადი ჩონჩხი დგას, სადაც ადრე ბაღი იყო“, –ამბობს ვადალიმერ ზედგინიძე.

[თინათინ ზაზაძე, ახალციხე]