მოხეს სკოლის მუსლიმი მოსწავლეები აქციებს შეწყვეტენ

მთავარი → სიახლე, საზოგადოება 27.12.2016

მოხეს საჯარო სკოლის მუსლიმმა მოსწავლეებმა, რომლებიც ორი დღის განმავლობაში საპროტესტო აქციებს მართავდნენ, აქციების შეწყვეტისა და გაკვეთილებზე დაბრუნების გადაწყვეტილება მიიღეს.

მოხეს სკოლის მუსლიმი მოსწავლეები აქციებს შეწყვეტენ

ხვალიდან მოხეს სკოლაში აქციები აღარ გაიმართება. ეს გადაწყვეტილება მოსწავლეებმა მას შემდეგ მიიღეს, რაც განათლების სამინისტროს შიდა აუდიტის სამსახურის წარმომადგენელს შეხვდნენ. მან მოსწავლეებს ურჩია საკლასო ოთახებს დაუბრუნდნენ, პრობლემის შესასწავლად და აღმოსაფხვრელად კი უმჯობესია სამინისტროს შიდა აუდიტს წერილობით მიმართონ.

შეგახსენებთ, დღეს დილიდან მოსწავლეებს, რომლებიც მოხის სკოლაში საპროტესტო აქციებს მართავდნენ, ჯერ საქართველოს პრეზიდენტის მრჩეველი უმცირესობათა საკითხებში სოფიო შამანიდი, შემდეგ კი განათლების სამინისტროს წარმომადგენელი შეხვდა.

მოხეს სკოლის მუსლიმი მოსწავლეები დირექტორის მხრიდან მუსლიმი გოგონასთვის თავსაბურავის მოხდის მითითებას აპროტესტებენ. მოსწავლეები ამბობენ, რომ ამ ქცევით დირექტორმა მუსლიმი აღმსარებლობის მოსწავლეებს შეურაცხყოფა მიაყენა, ეს მათი დისკრიმინაცია იყო და ამიტომ, მომხდარით განათლების სამინისტრო უნდა დაინტერესდეს.

[Sknews.ge]