მეხუთე სკოლაში მომხდარ ფაქტს სახალხო დამცველის აპარატი შეისწავლის

აღნიშნულის შესახებ სახალხო დამცველის აპარატში ”სამხრეთის კარიბჭედან” შეიტყვეს და მომხდარით მაშინვე დაინტერესდნენ. როგორც დღეს სახალხო დამცველის აპარატის პრესსამსახურის უფროსმა ნინო ერემაშვილმა ჩვენთან სატელეფონო საუბარში განაცხადა, აპარატი სკოლაში დირექტორის მიერ მოსწავლეებსა და დამლაგებელზე ძალადობის ფაქტის შესწავლას იწყებს.

- ”როცა მოკვლევას დავასრულებთ, მომხდარის შესახებ მხოლოდ ამის შემდეგ შევძლებთ კომენტარის გაკეთებას”, - ამბობს ერემაშვილი.

შეგახსენებთ, რომ ახალციხის მეხუთე საჯარო სკოლის მოსწავლეები და დამლაგებელი ამავე სკოლის დირექტორს, ჟენია მერაბიშვილს ცემაში ადანაშაულებენ.

ჟენია მერაბიშვილი ”ერთიანი ნაციონალური მოძრაობის” გენერალური მდივნის, ვანო მერაბიშვილის დედაა. მოსწავლეების თქმით, დირექტორმა ისინი 13 თებერვალს სკოლაში დაგვიანების გამო სცემა.

რაც შეეხება დამლაგებელს, ჟენია მერაბიშვილსდამლაგებელთან შელაპარაკება ხელფასის დაკლების გამო მოუვიდა. როგორც დამლაგებელი ამბობს, დირექტორმა ის კაბინეტში დაიბარა, ჯერ სიტყვიერი შეურაცხყოფა მიაყენა, შემდეგ კი ხელითაც შეეხო.

[თამუნა უჩიძე, ახალციხე]