სახალხო დამცველის აპარატი მოხეს სკოლაში მომხდარზე

სახალხო დამცველის აპარატის თანასწორობის დეპარტამენტში აცხადებენ, რომ მოხეს საჯარო სკოლის მეთორმეტე კლასელ გოგონასთან დაკავშირებული მოვლენების შესახებ, მედიისგან შეიტყვეს.

„ასევე მედიისგან ვიცით, რომ გოგონა სკოლაში მიიღეს. ამიტომ უფლების დარღვევის ფაქტს ადგილი არ ჰქონია და ამ ინფორმაციის საფუძველზე ჩვენ აღარ ვიმსჯელებთ იმაზე იყო თუ არა ეს დისკრიმინაცია. სამართლებრივად დისკრიმინაციისთვის უფლებადარღვევის ფაქტი უნდა გვქონდეს“, – ამბობს სახალხო დამცველის აპარატის თანასწორობის დეპარტამენტის უფროსი ქეთი შუბაშვილი.

მისი თქმით, თუ დადასტუდება რომ დირექტორის ნათია რეხვიაშვილის მხრიდან თავსაფრის მოხდასთან დაკავშირებით მსგავს ფაქტს ადგილი ნამდვილად ჰქონდა, მაშინ ეს უბრალოდ ცუდი პრაქტიკა იქნება.

„შემდგომ მოვლენების განვითარებას დავაკვირდებით, არ არის გამორიცხული რომ ამ გოგონას პრობლემები შემდგომ სასწვლო პროცესში შეექმნას“, – ამბობს შუბაშვილი.

შეგახსენებთ, მოხის სკოლის მეოთორმეტე კლასის მოსწავლეები ამბობენ, რომ მოხის სკოლაში გოგონას დირექტორმა თავსაფრის ტარება დაუშალა. მათი თქმით, თავსაფრის მოხდა სკოლის დირექტორმა ნათია რეხვიაშვილმა თეონა ბერიძეს მოსთხოვა. გოგონამ ერთი სემესტრი ბათუმში, №27 საჯარო სკოლაში ისწავლა და ახლა მობილობით მოხის სკოლაში ბრუნდებოდა. დირექტორმა კი უთხრა რომ სკოლაში იმ შემთხვევაში მიიღებდა, თუ თავსაბურავს მოიხდიდა. მათივე განცხადებით, დირექტორმა გოგონა სკოლაში მიიღო, თუმცა, მისდამი სოლიდარობისა და დირექტორის ქმედებისადმი პროტესტის ნიშნად, დღეს, 23 დეკემბერს, მოხის სკოლაში, მეთორმეტეკლასელი სხვა მუსლიმი გოგონებიც თავსაფრებით მივიდნენ.

საქართველოს განათლების სამინისტროში აცხადებენ, რომ თუ გოგონა ფიქრობს, რომ მისი უფლებები დაირღვა, შეუძლია სამინისტროს შიდა აუდიტს მიმართოს.

მოხეს მართლმადიდებელი მოსახლეობის თქმით, დირექტორის გაფრთხილება სამართლიანი იყო: „ეს არც მეჩეთია და არც ეკლესია, რომ თავდახურულმა იარო. დირექტორი სწორად მოიქცა. მერე რა რომ სარწმუნოება ავალდებულებს. ის რომ დღეს ყველა თავსაფრთ მივიდა სკოლაში, ეს უკვე პროვოკაციაა და საშიშია“.

დირექტორი 'სამხრეთის კარიბჭესთან' კომენტარს არ აკეთებს, თუმცა ის შეხვდა გოგონას დედას და უთხრა, რომ მისი შვილისთვის არაფერი აუკრძალავს.

[თამუნა უჩიძე, ადიგენი]