რესურსცენტრი: 'მეხუთე სკოლაში მომხდარს არავინ ადასტურებს’

ფოტო გადაღებულია 10.09.2011, სკოლის ახალი კორპუსის გახსნისას

ახალციხის საგანმანათლებო რუსურცენტრის უფროსის მოვალეობის შემსრულებელი ნინო დემეტრაძე იმ მოსწავლეებს, მშობლებსა და დამლაგებელს შეხვდა, რომლებიც ”სამხრეთის კარიბჭესთან” სკოლის დირექტორს ძალადობაში ადანაშაულებენ.

- ”მომხდარის შესახებ რომ შევიტყვეთ, ვეცადეთ თავად გადაგვემოწმებინა”, - გვითხრა დემეტრაძემ.

მისი თქმით, ცემის ფაქტი, მასთან საუბარში არავინ დაადასტურა: ”შევხვდი მოსწავლეებსაც, მშობლებსაც და სკოლის დირექტორსაც. მითხრეს, რომ მსგავსი არაფერი ყოფილა”.

საგანმანათლებლო რესურსცენტრს დღეს დილითვე განათლების სამინისტროდან დაუკავშირდნენ: ”აინტერესებდათ სკოლაში რა ხდებოდა, ვუთხარი რომ მომხდარს არავინ ადასტურებს”.

განათლების სამინისტროს პრესსამსახურის თიკო ფექირიშვილის თქმით, მოკვლევა დაწყებულია და სანამ არ დასრულდება, სამინისტრო მომხდართან დაკავშირებით კომენტარს არ გააკეთებს: ”პასუხი მაქსიმუმ სამშაბათისთვის გვექნება”.

შეგახსენებთ, რომ ახალციხის მეხუთე საჯარო სკოლის მოსწავლეები და დამლაგებელი, სკოლის დირექტორს ჟენია მერაბიშვილს, ”სამხრეთის კარიბჭესთან” ცემაში ადანაშაულებენ. ერთ-ერთი პედაგოგი კი, რომელმაც ასევე დაუდასტურა მომხდარი ”სამხრეთის კარიბჭეს”, აცხადებს, რომ დერეფანში მომხდარი ინციდენტი ორმა ვიდეოთვალმაც დააფიქსირა.

[თამუნა უჩიძე, ახალციხე]