მერაბიშვილის დედის საქმეს მთავარი პროკურატურა იკვლევს

პროკურატურამ საქმის მოკვლევა საქართველოს განათლებისა და მეცნიერების სამინისტროს მიერ გაგზავნილი წერილის საფუძველზე დაიწყო.

”განცხადება შემოსულია და მიმდინარეობს საქმის შესწავლა. თუ გამოჩნდება სისხლის სამართლის დანაშაული, საქმე აღიძვრება”, - გვითხრა საქართველოს მთავარი პროკურატურის პრესსამსახურის წარმომადგენელმა ეკა ჩიჩუამ.

მთავარმა პროკურატურამ წერილი განათლების სამინისტროსგან 5 მარტს მიიღო. ეს იყო ის დასკვნა, რომელიც განათლების სამინისტრომ პროკურატურასთან ერთად რეაგირებისთვის სამეურვეო საბჭოსაც გადასცა. განათლების სამინისტრომ კი საქმის შესწავლა საინფორმაციო სააგენტო ”სამხრეთის კარიბჭეში” გამოქვეყნებული სტატიის შემდეგ დაიწყო.

სტატიის გამოქვეყნების შემდეგ ახალციხის მეხუთე საჯარო სკოლაში მომხდარის შესწავლა სახალხო დამცველის აპარატმაც დაიწყო. მათ აღნიშნულის შესახებ სამცხე-ჯავახეთის საოლქო პროკურატურას შეატყობინეს.

”წერილი მივიღეთ სახალხო დამცველის აპარტიდან და რეაგირებისთვის გავგზავნეთ გენერალურ ინსპექციაში”, - ამბობს სამცხე-ჯავახეთის ოლქის პროკურორი გიორგი პაპუაშვილი.

შეგახსენებთ, რომ ახალციხის მეხუთე საჯარო სკოლის მოსაწავლეები და დამლაგებელი, ამავე სკოლის დირექტორს, პარტია ”ნაციონალური მოძრაობის” გენერალური მდივნის, ვანო მერაბიშვილის დედას, ცემაში ადანაშაულებენ.

[თამუნა უჩიძე, ახალციხე]