ვანო მერაბიშვილის დედის, ჟენია მერაბიშვილის მიერ გალახული მოსწავლეები - გამოხმაურება მედიაში

”ჟენია აბობოქრდა” - ამ სათაურით აქვეყნებს, ახალციხის მეხუთე სკოლაში მომხდარის შესახებ, სტატიას გაზეთ ”ასავალ-დასავალის” დღევანდელი, 18-24 თებერვლის ნომერი. გაზეთი მასალას ”სამხრეთის კარიბჭეს” ექსკლუზივზე დაყრდნობით წერს.

”ასავალ-დასავალის” სტატიაში, ახალციხის მეხუთე საჯარო სკოლაში მომხდარს ”პედაგოგთა საკოორდინაციო ცენტრის” ხელმძღვანელი დავით-ფერაძე ეხმაურება, რომელიც სამცხე-ჯავახეთის რეგიონში რამდენიმე წელიწადი მუშაობდა. მისი თქმით, ეს პირველი შემთხვევა არ არის: ”ჯერ კიდევ მანამ სანამ დირექტორი გახდებოდა, ჟენია მერაბიშვილისთვის პედაგოგებისა და მოსწავლეებისთვის” სიტყვიერი და ფიზიკური შეურაცყოფის მიყენება ჩვეულებრივი ამბავი იყო. ეს იმ ადამიანებისგან ვიცი, რომლებიც თავად გამხდარან ჟენია თუმანიშვილისაგან ფიზიკური ძალადობის მსხვერპლნი”.

ბეჭდური მედიიდან ამბავს მეორე დღესვე გამოეხმაურა გაზეთი ”ახალი თაობაც”.

მე-5 სკოლაში მომხდარს, ”სამხრეთის კარიბჭეს” საინფორმაციო პორტალზე დაყრდნობით 14 თებერვალს, ჩვენს ვებ-გვერდზე გამოქვეყნებისთანავე გამოეხმაურა ონლაინ-გამოცემა ”ნეტგაზეთი”.

”მერაბიშვილის დედა: მოსწავლე არ მიცემია, მაგრამ კარგად გავლანძღე” - ამ სათაურით გამოქვეყნებულ სტატიაში ჟენია მერაბიშვილმა ბრალდება უარყო და განაცხადა, რომ "სამხრეთის კარიბჭე" მოსწავლეების გამოყენებით მიზანმიმართულად ახორციელებს მასზე და მის ოჯახზე ზეწოლას: "მაგათ ჩემს სკოლაში არასდროს ვუშვებდი, ისეთებს წერდნენ ჩემს ოჯახზე”.

15 თებერვალს ასევე ”სამხრეთის კარიბჭეზე” დაყრდნობით, ამბავს ამბები.ჯე- გამოეხმაურა.

- ”ჟენია მერაბიშვილი სკოლის დირექტორი გახლავთ. რამდენიმე წლის წინ ის საუკეთესო სკოლის დირექტორად დაასახელეს. ახლა კი ჟენია მერაბიშვილს სკოლის მოსწავლეების ცემაში სდებენ ბრალს”, - ნათქვამია სტატიაში.

”განათლების სამინისტრო ახალციხეში მომხდარ ფაქტს სწავლობს” - ამ სათაურით გამოაქვეყნა მოკლე ინფორმაცია გაზეთმა 24 საათმა თავის ვებ-გვერდზე 6 თებერვალს. გამოცემა საქართველოს განათლებისა და მეცნიერების მინისტრის განცხადებით შემოიფარგლა: “ამ გადაცდომის შესწავლის პროცესში არც პოზიტიური, არც ნეგატიური მნიშვნელობა არ აქვს იმას, ვინ ვისი დედაა, შვილია ან - გარე ბიძაშვილი. მიმდინარეობს ამ საქმის შესწავლა. ცნობისთვის, გავრცელდა ინფორმაცია, რომ ვანო მერაბიშვილის დედამ ჟენია მერაბიშვილმა, რომელიც ახალციხეში სკოლის დირექტორია, სკოლაში დაგვიანების გამო, მეთერთმეტე კლასის მოსწავლე გოგონები ქოლგით სცემა”.

ჩვენს მასალაზე დაყრდნობით, მასალები კიდევ არაერთმა ონლაინ-გამოცემამ მოამზადა. მაგალითად: ”ინტერმედიამ”, ”ობიექტივმა”, ”საქართველო და მსოფლიომ”, ”ნიუს პლუსმა”, ”ქიზიყმა”.

ოდნავ მოგვიანებით გიამბობთ რა გამოხმაურება მოჰყვა ამბავს სატელევიზიო სივრცეში.

[ნინო ნარიმანიშვილი, ახალციხე]