გამგებლის წარმომადგენელი ვალეში: „ორ დღეში ვალეში წყალი მოვა“

მეათე დღეა რაც ქალაქ ვალეს სასმელი წყალი არ მიეწოდება. მიზეზი ძლიერი ყინვებია. ამიტომ წყალმომარაგების კომპანიას წყალი დასახლების ცენტრამდე „ცისტერნებით“ მიაქვს, აქედან კი ადგილობრივებს მისი ზიდვა სახლებამდე ხელით უხდებათ.

როგორც ახალციხის მუნიციპალიტეტის გამგებლის წარმომადგენელი ვალეში ელიოზ ბარბლიშვილი ამბობს, ვალეს წყლის სათავე ნაგებობაზე ტექნიკა ყინულის დასამტვრევად და ასევე ყინულისგან გაჭედილი მილების გასაწმენდად სამი დღე მუშაობდა.

„იმ ადგილიდან საიდანაც წყალი შემოდის ვიდრე ფილტრამდე და შემკრებ ბასეინამდე მივა კილომეტრნახევარია დაახლოებით. ეს მონაკვეთი მთლინად გავწმინდეთ და გავჭერით. მაქსიმალური საშუალება მივეცით წყალს რომ იმოძრაოს“, – ამბობს ბარბლიშვილი.

მისი თქმით, ორ დღეში ბასეინში წყალი დაგროვდება და მოსახლეობამდეც მივა: „ხვალ არადა ზეგ ვალეში წყალი მოვა. სათავეზე ზოგგან ნაევარმეტრიანი ყინულები ამოვჭერით“.

შეგახსენებთ, რომ ვალეს სასმელი წყლის მიწოდება 29 დეკემბერს შეუწყდა.

მოსახლეობამ პეტიცია მოაზადა, რომელის მიხედვითაც ხელისულფებას მომხდარით დაინტერესებასა და გამომწვევი მიზეზების შესწავლას სთხოვენ. ამ დროისთვის მას ხელს 200–ზე მეტი პირი აწერს.

[თამუნა უჩიძე, ახალციხე]