მეხუთე დღეა ვალეში მცხოვრებლებს წყალი არ აქვთ

ვალელების ნაწილი წყალს მეზობელი სოფლიდან პამაჯიდან, ნაწილი კი დასახლებაში არსებული ჭებიდან ზიდავს.

„ვინც პამაჯში მანქანით მიდის ვთხოვთ, რომ ცოტა მაინც წამოგვიღოს და ვინაწილებთ. ნაწილი მეზობლის ჭიდან ვეზიდებით ხვეწნა–მუდარით. საკმარისი წყალი არსად არ არის. ხალხი ძალიან გაღიზიანებულია“, – ამბობს მაია ნარიმანიშვილი.

ნარიმანიშვილის მსგავსად ვალეში წყლის გარეშე ასობით ოჯახია დარჩენილი . ადგილობრივები წყალომარაგების კომპანიისგან და ახალციხის მუნიციპალიტეტის გამგეობისგან ყურადღებას ითხოვენ.

„დღეს წყალი ნახევარი საათი მოვიდა და ისევ მოწყდა. ამბობენ „მატორი“ გაფუჭდაო. ისევ უწყლოდ ვართ“, –ამბობს ვალეში მცხოვრები ჯაბა ნათენაძე.

მისი თქმით, ზაფხულის პერიოდში ქალაქ ვალეს წყლის პრობლემა ყოველთვის ექმნება.

„გაერთიანებული წყალმომარაგების კომპანიაში“ აცხადებენ, რომ ქალაქში წყლის შეწყვეტის მიზეზი ცენტრალურ მაგისტრალზე მილის დაზიანება გახდა. როგორც კომპანიაში განგვიმარტეს მილი უკვე შეკეთებულია და ხვალიდან, 23 ივლისიდან წყლის მიწოდება აღდგება, თუმცა შემცირებული განრიგით.

„ამ წუთებშიც სათავეზე ვართ და წყლის დებეტის გაზრდაზე ვმუშაობთ. ნაცვლად 7 საათიანი მომარაგებისა, ვალის მოსახლეობას ხვალ წყალს 5 საათით მივაწოდებთ. მომდევნო დღეებში დროის ხანგრძლივობა გაიზრდება“, – ამბობს „გაერთიანებული წყალმომარაგების კომპანიის“ ოპერირების და ექსპლოატაციის დეპარტამენტის უფროსი მიხეილ თათარაძე.

ხუთდღიანი უწყლობის შემდეგ დღეს, 22 ივლისს, დღის მეორე ნახევარში ვალეში, კორპუსში მცხოვრები მოსახლეობისთვის სასმელი წყალი „ცისტერნებით“ მიიტანეს.

„სიცხეების გამო მკვეთრად დაეცა მდინარის დონე და ბასეინებშიც წყალმა დაიკლო. მანამდე დაზიანება იყო.მუშაობს წყალკანალი და ჩვენც ჩართულები ვართ. ახალციხიდან წყალმომარაგების კომპანიის „ცისტერნებით“ ვაწვდით მოსახლეობას წყალს, ახლაც რიგდება“, – ამბობს ელიოზ ბარბლიშვილი.

მისი თქმით, მოსახლეობისთვის „ცისტერნებით“ წყლის მიწოდება ადგილობრივი თვითმმართველობის მოთხოვნა იყო: „გუშინ აქ იყო გამგებელი, რადგან ჯერ ვერ ხერხდებოდა წყლის აღდგენა კომპანიას ვთხვეთ, რომ წყალი დაერიგებინათ მოსახლეობისთვის“.

[თინათინ ზაზაძე, ახალციხე]