მერვე დღეა ვალეში სასმელი წყალი არ აქვთ

ქალაქ ვალეს წყლის მიწოდება 30 დეკემბერს შეუწყდა. მოსახლეობის ნაწილი, მათ ვისაც მანაქანა ყავთ, წყალს მეზობელი სოფლებიდან ეზიდება. ნაწილი კი წყალმომარაგების კომპანიის იმედზეა დარჩენილი.

ადგილობრივების განმარტებით „ცისტერნებით“ მიტანილი წყალი საკმარისი არ არის. გარდა ამისა, წყალმომარაგების კომპანიის მანქანა ქალაქის ცენტრში ჩერდება, ადგილობრივებს სახლამდე წყლის მიტანა –12 გრადუს ყინვაში ფეხით უწევთ.

ვალეში პრობლემის მოგვარების მიზნით ხელმოწერებსაც აგროვებენ.

„მოვითხოვთ ჩატარდეს გამოძიება, რატომ იქმნება სასმელ წყალთან დაკავშირებით ერთიდა იგივე პრობლემა სისტემატიურად.გთხოვთ გამოიძიოთ პრობლემის გამომწვევი მიზეზი (არის დაუდევრობა, საქმის არ ცოდნა, არაპროფესიონალიზმი თუ სხვა რამ) და მიიღოთ შესაბამისი ზომები რომ მსგავსი რამ აღარ განმეორდეს“, – ნათქვამია პეტიციაში, რომელსაც ხელს 178 ადამიანი აწერს.

წყალმომარაგების კომპანიაში აცხადებენ, რომ ვალეს მოსახელობას სასმელ წყალს სამი მანქანით აწოდებენ. პარალელურად მიმდინარეობს სამუშაოები სათავე ნაგებობაზე, საიდანაც ქალაქ ვალის მოსახლეობა მარაგდება.

„მძიმე ტექნიკით იწმინდება, ჩართულია მუშახელიც“, – აცხადებენ კომპანიაში.

მათივე თქმით, ვალეში წყლის სისტემის რეაბილიტაციისთვის საპროექტო სამუშაოებზე ტენდერია გამოცხადებული. 2018 წლიდან ვალეში წყლის ახალი სისტემა დამონტაჟდება და ადგილობრივებს პრობლემა მოუგვარდებათ.



[თინათინ ზაზაძე, ახალციხე]