ვალელებს წყალი ისევ არ აქვთ

ვალეში წყლის მიწოდება ტექნიკური პრობლემის გამოა შეწყვეტილი. საქართველოს გაერთიანებული წყალმომარაგების კომპანიის სამცხე-ჯავახეთის რეგიონულ ფილიალში განმარტავენ, რომ ვალის სადრენაჟო სისტემას წყალი შეზღუდული რაოდენობით მიეწოდება.

„დღეს დილით ცოტა ხნით მოვიდა წყალი, მაგრამ ძალიან მალე შეწყდა, ჭურჭლის ავსებაც კი ვერ მოვასწარით“, - ამბობენ ვალეში.

ახალციხის მუნიციპალიტეტის გამგეობაში კი ირწმუნებიან, რომ ვალეში წყლის მიწოდება დღეს დილით აღდგა.

„რწმუნებულმა მითხრა, რომ ვალეში ისევ მიმდინარეობს სამუშაოები, მაგრამ დღეს მოსახლეობას წყალი მიეწოდა. დებეტი იმხელა არ არის, რომ 24 საათის განმავლობაში მიეწოდოს, ვალეს ისედაც გრაფიკით მიეწოდებოდა წყალი. მაგრამ, როგორც მე ვიცი, დღეს ვალეში ოთხი საათის განმავლობაში იყო წყალი“, - განმარტავს ბესიკ ბლიაძე.

შეგახსენებთ, რომ ვალეში მოსახლეობამ გუშინ სასმელი წყლის მოთხოვნით ცენტრალური გზა გადაკეტა. ამის შემდეგ ადგილობრივი ხელისუფლების წარმომადგენლებმა მათ წყალი სპეციალური ავზების საშუალებით დაურიგეს.

[თამარ თოთაძე, ახალციხე]