ვალელები უწყლოდ კიდევ 2 დღე იქნებიან

სათავე ნაგებობაზე ე.წ. მეორე შახტაში, დამბის მოსაწყობად 500 კუბური მეტრი ხრეში შეიტანეს.

„დამბა გავაკეთეთ იმისთვის, რომ წყალი დაგროვდეს“, - ამბობს ვალეს რწმუნებული ზურაბ ნასყიდაშვილი.

მისი თქმით, შესაძლოა ხვალ მოსახლეობისთვის წყლის მიწოდება აღდგეს: „ხვალ თუ არა, მაქსიმუმ ორ დღეში ვალე წყალს მიიღებს. დღეს წყლის მიწოდება ვცადეთ, 40 წუთი იდინა და მოწყდა, წყლის მარაგი ავზში საკმარისი არ აღმოჩნდა“.

ნასყიდაშვილის თქმით, სანამ წყლის მიწოდება ჩვეულებრივ რეჟიმში აღდგება, მოსახლეობას წყალს კვლავ ავზებით დაურიგებენ: „გუშინ 10 ტონა დავარიგეთ და ხვალაც ასე მოვიქცევით თუ საჭირო გახდება“.

შეგახსენებთ, რომ ვალეს კვირაზე მეტია წყალი არ მიეწოდება. ადგილობრივებმა, გუშინ, 30 ივნისს, სასმელი წყლის მოთხოვნით გზა გადაკეტეს და აცხადებენ, რომ წყლის მიწოდება თუ არ აღუდგებათ, აქციას კიდევ გამართავენ.

[თამუნა უჩიძე, ახალციხე]