შეცვლილი საკონკურსო კომისია და შვიდი ვაკანსია მერიაში

ახალციხის მერია ახალ კადრს შვიდ პოზიციაზე შეარჩევს, ამათგან, ხუთი სპეციალისტია, ორი კი სამსახურის უფროსი. სამსახურის უფროსებს მერი დანიშნავს, შესარჩევი კონკურსი კი სპეციალისტებისთვის გამოცხადდება.

ქალაქის მერმა, ვლადიმერ ზედგინიძემ, რომელიც 2016 წლის ოტქომბრის რიგგარეშე არჩევნებზე აირჩიეს, უფროსები ორი სამსახურისთვის უნდა შეარჩიოს. ესენია: ეკონომიკური განვითარების, მუნიციპალური ქონების მართვისა და შესყიდვების სამსახური და მუნიციპალური ზედამხედველობის, ადგილობრივი მოსაკრებლებისა და გადასახადების სამსახური.

ქალაქის მერი ამბობს, რომ ამ სამსახურებში მოხელეებს, მათი ცოდნისა და გამოცდილების გათვალისწინებით დანიშნავს.
რაც შეეხებათ სპეციალისტებს (ასეთი მერიაში 5 ვაკანსიაა), ვლადიმერ ზედგინიძის თქმით, გადამწყვეტი აქაც ცოდნა და გამოცდილება იქნება. მთავარი აქცენტი კი გამოცდილებაზე გაკეთდება, ეს მოთხოვნა აქამდე გადამწყვეტი არ იყო.

„საჭიროა 1, 3 და 5–წლიანი გამოცდილება, სპეციალობების მიხედვით. აქამდე ეს მითითებული არ იყო“, – ამბობს ვლადიმერ ზედგინიძე და ამატებს, – „ვცდილობთ სამსახურებში შრომითი საქმიანობა წარმართოს სპეციალისტმა, რომელსაც არამარტო უნარი, არამედ შესაბამისი გამოცდილება ექნება“.

როდის გამოცხადდება საჯარო მოხელეთა შესარჩევი კონკურსი, ამ ეტაპზე უცნობია. თუმცა, რაც უკვე ცნობილია, კომისიას, რომელმაც ახალი თანამშრომლები უნდა შეარჩიოს, თავმჯდომარე შეეცვალა. ეს პოზიცია ვლადიმერ ზედგინიძემ დაიკავა. მის კომისიის თავმჯდომარედ არჩევას, დეპუტატებმა დღეს, 22 დეკემბერს უყარეს კენჭი.

ვლადიმერ ზედგინიძე ირწმუნება, რომ ამ ეტაპზე სამსახურიდან არცერთი თანამშრომელი არ გათავისუფლდება, თუმცა რეორგანიზაცია იქნება – თანამშრომელთა ნაწილი დაწინაურდება, ნაწილი კი ჩამოქვეითდება.

[თინათინ ზაზაძე, ახალციხე]