რის მიხედვით შეარჩევს ახალციხის ახალი მერი კადრებს

ახალციხის მერიაში საკადრო ცვლილებების შესახებ ახალარჩეულმა მერმა ვლადიმერ ზედგინიძემ „სამხრეთის კარიბჭეს“ ყოველკვირეულ გადაცემაში „კვირის აქცენტში“ ისაუბრა. სადაც მან შეკითხვაზე, გეგმავს თუ არა იგი საკადრო ცვლილებების განხორციელებას, გვიპასუხა: „რა თქმა უნდა, ეს აუცილებელიც იქნება და საჭიროც. ეს საერთო საქმისა და ქალაქის ცხოვრებისთვის არის აუცილებელი და არა იმისთვის, რომ ჩემი იქ მისვლით რევოლუციური ცვლილებები უნდა ჩავატაროთ, რაც დისონანს გამოიწვევს კადრებთან მიმართებაში“.

მისი თქმით, მას შემდეგ რაც მას, როგორც მერს რწმუნება მიეცემა, თვითმმართველობის კოდექსის 59–ე მუხლის შესაბამისად, ყველა სამსახურის უფროსი უნდა გადადგეს: „როგორც კი საკრებულო ამ რწმუნებას ჩამაბარებს მე წარვადგენ სამსახურების უფროსებსა და ჩემს მოადგილეებს“.

ვლადიმერ ზედგინიძე უფლებამოსილების შესრულებას 18 ნოემბერს შეუდგა. ამავე დღეს, მან განაცხადა, რომ ქალაქის ვიცე მერი ილია ზარდიაშვილი იქნება. რაც შეეხება მეორე მოადგილეს ზაზა გელაძეს, დარჩება თუ არა იგი კვლავ მერის მოადგილედ, ზედგინიძე ამაზე ჯერ არ საუბრობს: „შევთანხმდებით უახლოეს მომავალში“.

რის მიხედვით იხელმძღვანელებს ზედგინიძე მეორე მოადგილის შერჩევისას უცნობია, სამსახურის უფროსებს კი წარგენილი ანგარიშების მიხედვით დანიშნავს: „წლის ბოლოა თითქმის, ყველას უნდა ჰქონდეს გაწეული საქმიანობის შესახებ ანგარიში. მე ამ ანგარიშს ჩავიბარებ. რა ამოცანებიც გვაქვს დასახული იმათ განსახორციელებლად რამდენად შესწევთ ძალა, აი, ამას გავითვალისწინებ“.

[თამუნა უჩიძე, ახალციხე]