გიორგი გასვიანის საქმეზე ტრენინგის მონაწილეები იკითხებიან

18 დეკემბერს, ბორჯომში მომხდარი შემთხვევის შემდეგ სასტუმროში დაბრუნებულ tv “იბერიის“ ჟურნალისტს გიორგი გასვიანს ნინო ერემაშვილი და ქეთი ელიაშვილი შეხვდნენ. ტრენინგის მონაწილეებმა სწორედ ამის შესახებ უნდა მისცენ ჩვენება.

ტრენინგის ორგანიზატორის ნინო ერემაშვილის დაკითხვა დაახლოებით 20 წუთის წინ დაიწყო.

შეგახსენებთ, რომ ტელეკომპანია „იბერიას“ ჟურნალისტი გიორგი გასვიანი ბორჯომელ პოლიციელს ცემაში ადანაშაულებს. ინციდენტი 18 დეკემბერს მოხდა. მაშინ, როდესაც ჟურნალისტი, ბორჯომში, სასტუმრო ‘ქრაუმ პლაზაში’ სემინარზე მიდიოდა.

სწორედ აღნიშნული ტრენინგის „ადამიანის საერთაშორისო სტანდარტების“ მონაწილეები იკითხებიან ამ დროსთვის.

საქმეზე ძიება საქართველოს სისხლის სამართლის კოდექსის 126-ე მუხლის პირველი ნაწილით დაიწყო, რაც ძალადობას გულისხმობს და ისჯება თავისუფლების შეზღუდვით ვადით ორ წლამდე ან თავისუფლების აღკვეთით ვადით ერთიდან სამ წლამდე.
საქართველოს პროკურატურის ინფორმაციით ძიებას კიდევ ერთი 333-ე მუხლის მე-3 ნაწილის „ბ“ ქვეპუნქტი დაემატა, რაც სამსახურეობრივი უფლებამოსილების გადამეტებას ძალადობით ან იარაღის გამოყენებით გულისხმობს.

ბორჯომელი პოლიციელი და მისი ორი მეგობარი, რომლებსაც გიორგი გასვიანი ცემაში ადანაშაულებს ამ დრომდე დაკავებულები არ არის.

[თამუნა უჩიძე, ბორჯომი]