„იბერიას“ ჟურნალისტი ბორჯომელ პოლიციელს ცემაში ადანაშაულებს

ჟურნალისტის თქმით, დაპირისპირება 18 დეკემბერს გვიან ღამით მოხდა, როდესაც ბორჯომში მოყინული გზის გამო, მისი მანქანა მოსრიალდა. სამართალდამცველი, რომელსაც გასვიანი ცემაში ადანაშაულებს, მეგობრებთან ერთად სწორედ იმ ქუჩაზე იმყოფებოდა.

„შეფერხებებით მოვდიოდი, გზა მოყინული იყო და მოვცურდი, რის შემდეგაც იქ მყოფმა პოლიციელმა მანქანაში მჯდომს დამარტყა, იარაღი მომაბჯინა მხარზე, შემდეგ რომ გაიგეს ჟურნალისტი ვიყავი, უფრო მეტი აგრესია გაუჩნდა და მემუქრებოდა არ გააშუქოო. ნაცემი რომ ვიყავი მომაცილეს სასტუმროში იმ პირობით, რომ მე ამას არ ვიტყოდი, მეც დავპირდი თავი რომ დამეძვრინა. ეს პოლიცელი ვინმე მიშა ხუციშვილია“-ამბობს „იბერიას“ წამყვანი გიორგი გასვიანი.

ინცინდენტის შემდეგ, გიორგი გასვიანი საქართველოს შინაგან საქმეთა სამინისტროს გენერალურ ინსპექციას თავად დაუკავშირდა და მომხდარის შესახებ აცნობა. მისივე თქმით, უწყების წარმომადგენლებმა ჟურნალისტი ჯერ ტელეფონით დაკითხეს, შემდეგ კი ბორჯომის რაიონულ სამმართველოში გადაიყვანეს.

18 დეკემბერსვე მას, სამედიცინო შემოწმება ჩაუტარდა. როგორც ჟურნალისტი აცხადებს, დაზიანებები მხრის, თავისა და სახის არეში აქვს მიყენებული, თუმცა სიცოცხლისათვის საშიში არცერთია.

შსს ინფორმაციით, ინცინდენტს გენერალური ინსპექცია სისხლის სამართლის კოდექსის 126-ე მუხლით იკვლევს, რაც ძალადობას გულისხმობს და ისჯება თავისუფლების შეზღუდვით ვადით ორ წლამდე ან თავისუფლების აღკვეთით ვადით ერთიდან სამ წლამდე.

იმყოფებოდა თუ არა ნასვამ მდგომარეობაში სმართალდამცველი, ამასთან დაკავშირებით, შსს-ში კომენტარს არ აკეთებენ.

ტელეკომპანია „იბერიას“ ჟურნალისტი, ბორჯომში, სასტუმრო ‘ქრაუმ პლაზაში’ სემინარზე მიდიოდა, რომელიც ადამიანის უფლებათა დაცვის გაშუქებას ეხება.


[ლუბა გიორგაძე, ბორჯომი]