რა კითხვები ჰქონდა გამოძიებას გიორგი გასვიანის საქმეზე ტრენინგის ორგანიზატორთან

18 დეკემბერს მოხდარი ინციდენტის შემდეგ გიორგი გასვიანი სასტუმრო ‘ქრაუმ პლაზაში’ პირველად ტრენინგის ორგანიზატორს ნინო ერემაშვილს შეხვდა. გამოძიება დაინტერესდა რა დროს და როგორ მდგომარეობაში დაბრუნდა სასტუმროში გასვიანი.

„ყველა დეტალი, რაც მე გიორგიმ მაშინ მომიყვა, ვუამბე გამოძიებას. გიორგი რომ მოვიდა დახმარებას მთხოვდა, ძალიან შეშინებული იყო. ჩემთვის ცნობილი იყო, რომ ამავე სასტუმროში ტრენინგი თუ კონფერენცია ჰქონდა შსს–ს,მე მათ მივმართე დახმარებისთვის და შემდეგ უკვე ისინი გაესაუბრნენ გიორგის“, – ამბობს ნინო ერემაშვილი.

მისივე თქმით,ინციდენტის ღამეს სასტუმრო ‘ქრაუმ პლაზაში’ გენერალური ინსპექციის წარმომადგენელიც იმყოფებოდა: “ის რამდენიმე წამში მოვიდა სასტუმროს ჰოლში. გიორგიმ მასაც უამბო მოხდარის შესახებ. ამის შემდეგ, მათ დააფიქსირეს შეტყობინება გენერალურ ინსპექციაში, ამჟამად, მიმდინარეობს გამოძიება“.

ნინო ერემაშვილი გიორგი გასვიანის სასტუმროში მისვლის ფაქტს იხსენებს და ამბობს, რომ ჟურნალისტი ძალიან აღელვებული იყო:„ქურთუკზე შესაკრავი ჰქონდა გაფუჭებული და კაპიშონი ნახევრად მომძვრალი. სახეზე აწითლებული იყო, ემოციური ფონის გამო, ნაწყვეტ–ნაწყვეტ საუბრობდა“.

ამ დროისთვის, სამცხე–ჯავახეთის საოლქო პროკურატურის გამომძიებელი პირველი არხის ჟურნალისტს ქეთი ელიაშვილს კითხავს.

შეგახსენებთ, რომ ტელეკომპანია „იბერიას“ ჟურნალისტი გიორგი გასვიანი ბორჯომელ პოლიციელს ცემაში ადანაშაულებს. ინციდენტი 18 დეკემბერს მოხდა. მაშინ, როდესაც ჟურნალისტი, ბორჯომში, სასტუმრო ‘ქრაუმ პლაზაში’ სემინარზე მიდიოდა.

მომხდარს სამცხე–ჯავახეთის საოლქო პროკურატურა საქართველოს სისხლის სამართლის კოდექსის 126-ე მუხლის პირველი ნაწილით და 333-ე მუხლის მე-3 ნაწილის „ბ“ ქვეპუნქტით იძიებს.

[sknews.ge]