Tv ‘იბერიას’ ჟურნალისტს პროკურატურამ გამოძიების დეტალები გააცნო

„იბერიას“ ჟურნალისტის, მისი ადვოკატისა და პროკურორის შეხვედრა, სამცხე-ჯავახეთის საოლქო პროკურატურაში 2 საათზე მეტ ხანს გაგრძელდა.

გიორგი გასვიანის თქმით, საგამოძიებო უწყებამ მას ძიების შესახებ ახალი ინფორმაცია მოიაწოდა თუმცა, რა ახალი დეტალებია ცნობილი, ჟურნალისტი და მისი ადვოკატი გამოძიების ინტერესებიდან გამომდინარე არ საუბრობენ.

„დეტალებს, რომ არ ვასაჯაროვებ, არ მინდა ვინმეს ეგონოს, რომ რამეს ვერიდები. ეს უბრალოდ გამოძიების ინტერესებია. მე ამ საქმეს ბოლომდე მივიყვან და ჩემს ცემაში მონაწილე ყველა პირი მკაცრად დაისჯება“,- განაცხადა შეხვედრის დასასრულს „იბერიას“ ჟურნალისტმა გიორგი გასვიანმა.

მისივე თქმით, გამოძიება ყველაფერს აკეთებს, რათა მეტი მტკიცებულებები მოიპოვოს და მისი ობიექტურობის იმედი აქვს. დაზარალებული, პროკურატურისაგან დამატებით დეტალებს კიდევ ელოდება.

შეგახსენებთ, რომ ტელეკომპანია „იბერიას“ ჟურნალისტი გიორგი გასვიანი ბორჯომელ პოლიციელს ცემაში ადანაშაულებს. საქმეზე ძიება საქართველოს სისხლის სამართლის კოდექსის 126-ე მუხლის პირველი ნაწილით დაიწყო, რაც ძალადობას გულისხმობს და ისჯება თავისუფლების შეზღუდვით ვადით ორ წლამდე ან თავისუფლების აღკვეთით ვადით ერთიდან სამ წლამდე. გარდა ამიასა, საქართველოს პროკურატურამ საქმის ძიებას კიდევ ერთი 333-ე მუხლის მე-3 ნაწილის „ბ“ ქვეპუნქტი დაუმატა, რაც სამსახურეობრივი უფლებამოსილების გადამეტებას ძალადობით ან იარაღის გამოყენებით გულისხმობს.

[sknews.ge]