ბორჯომში საახალწლო ღონისძიებისთვის გამოცხადებული ტენდერი შეჩერდა

ბორჯომსა და დაბა ბაკურიანში საახალწლო ღონისძიებებისთვის ბორჯომის მუნიციპალიტეტის გამგეობამ ტენდერი 27 ოქტომბერს, 91 200 ლარზე გამოაცხადა.

ტენდერში მონაწილეობა ორმა პრეტენდენტმა: დავით გოდერძიშვილმა და ლაშა კვარაცხელიამ მიიღეს.

ყველაზე ნაკლები თანხა ვაჭრობის დროს 76 650 ლარი ინდ. მეწარმე ლაშა კვარაცხელიამ დაფიქსირა, თუმცა არასრული დოკუმენტაციის გამო სატენდერო კომისიამ დისკვალიფიკაცია მიანიჭა.

ლაშა კვარაცხელიამ სახელმწიფოს შესყიდვების სააგენტოს დავების განხილვის საბჭოში იჩივლა. ამ ეტაპზე ელექტრონული ტენდერი შეჩერებულია აღნიშნული საბჭოს გადაწყვეტილების მიღებამდე.

როგორც ბორჯომის მუნიციპალიტეტში განმარტავენ, საბჭოს გადაწყვეტილებას დღეს, 13 დეკემბერს ელოდებიან.

სატენდერო დოკუმენტაციის მიხედვით, გამარჯვებულმა კომპანიამ ბორჯომსა და ბაკურიანში საახალწლო ღონისძიების ჩატარება უნდა უზრუნველყო, დაამონტაჟოს სცენა და მოიწვიოს მომღერლები.

ბორჯომში საახალწლო კონცერტი 18:00 საათზე დაიწყება, ბაკურიანში კი 22:00 საათზე. ფიფქია და თოვლის ბაბუა კონცეტრის დაწყებამდე სახალწლო გრილიანდებით მორთული ეტლით ბავშვებს საჩუქრად ტკბილეულს დაურიგებენ. სასაჩუქრე პაკეტი 200 პატარაზეა გათვლილი.

კონცერტის მიმდინარეობისას რკინის კასრებში ცეცხლი აინთება. ალკოჰოლური და ცხელი სასმელების კომპანიები პროდუქციის რეკლამირებისა და რეალიზაციისთვის, სტუმრებს თავიანთ პროდუქციას შესთავაზებენ. საზეიმო ღონისძიება გრანდიოზული ფოიერვერკით დასრულდება.

[თინათინ ზაზაძე, ბორჯომი]