ახალციხის მერი: ‘ქალაქში შენობებია, რომლებზეც ხეები ამოვიდა უპატონობით’

ახალციხის ახალარჩეულმა მერმა ვლადიმერ ზედგინიძემ იმ შენობებთან დაკავშირებით, რომლებიც ქალაქში მიტოვებული და გამოუყენებელია, „სამხრეთის კარიბჭეს“ ყოველკვირეულ გადაცემაში „კვირის აქცენტში“ ისაუბრა.

მისი თქმით, იგი აქტიურად აპირებს ურთიერთობას ეკონომიკის სამინისტროსთან, იმ მიზნით, რომ თვითმმართველობის ბალანსზე გადმოვიდეს შენობები, რომელთა გამოყენების უფლებაც ამ დროისთვის ქალაქს არ აქვს. კითხვაზე, რაში გამოიყენებს ამ შენობებს, ქალაქის მერმა, რამდენიმე დაწესებულების შექმნის სურვილი გაამხილა.

„პირველ რიგში, მინდა, რომ ქალაქში კულტურის სახლი გვქონდეს. ამისთვის ის შენობა, რომელშიც ამჟამადაა განთავსებული კულტურის სახლი, ცოტა უხერხულია, ავარიულია“, – ამბობს ზედგინიძე.

მისივე თქმით, იგი აქტიურად იმუშავებს იმისთვისაც, რომ ქალაქში ახალგაზრდული ცენტრი გაკეთდეს: „ახალგაზრდებზე უნდა ვიზრუნოთ. ნუ ვისაუბრებთ მხოლოდ იმაზე, რომ სხვა დაწესებულებებში შედიან სათამაშოდ, რის გამოც ბევრი ოჯახი დაიღუპა. მაგრამ მხოლოდ ახალგაზრდები არაა ჩვენი ზრუნვის ობიექტი. რა დააშავა იმ ხალხმა, რომლებიც ასაკმა და ცხოვრებამ დაამძიმა?! ამისთვის პატარა სათნოების სახლი არ გავაკეთოთ?!“

ზედგინიძის განცხადებით, ახალციხეში სხვადასხვა შენობებთან დაკავშირებით დავაა: „არადა ქალაქში არის მთელი რიგი შენობები, რომლებზეც ხეები ამოვიდა უპატრონობით. მას დროზე უნდა შველა“.

[თამუნა უჩიძე, ახალციხე]