რისთვის ქმნის ახალციხის ახალი მერი საზოგადოებრივ ჯგუფებს

ახალციხის მერი ვლადიმერ ზედგინიძე, რომელსაც დღეს, 21 ნოემბერს პირველი სამუშაო დღე აქვს, აცხადებს, რომ მოქალაქეებთან ურთიერთობას აქტიურად აპირებს.

„ჩემი მიზანი საზოგადოებასთან კავშირია. არ აქვს მნიშვნელობა ის ჩემი ამომრჩეველი იყო თუ არა, მეწინააღმდეგებოდა თუ თანამშრომლობდა ჩემთან. მე ყველას მერი ვარ“, – განაცხადა „სამხრეთის კარიბჭეს“ ყოველკვირეულ გადაცემაში "კვირის აქცენტში" ვლადიმერ ზედგინიძემ.

მისი თქმით, მოქალაქეებთან ურთიერთობის თვალსაზრისით კანონში ყველა დეტალი ზედმიწევნითაა გაწერილი: „შევქმნი საზოგადოებრივ ჯგუფებს დასახლებული პუნქტების მიხედვით. ეს იყოს თუნდაც სამი, ან ხუთკაციანი შემადგენლობა. ისე კი არ უნდა იყოს, რომ გამოვიდეთ ქალაქის ერთ უბანში და დავიძახოთ ხალხო მოდით, კრებას ვიწყებთ, არა. წარმომადგენლები უბნებმა თავად უნდა აირჩიონ, ისეთები ვინც რაღაცას მართლაც გააკეთებენ და მათთან უნდა ვითანამშრომლოთ“.

ზედგინიძის განცხადებით, ასეთი ჯგუფების გარეშე მუშაობა გაუჭირდება: „მათთან ერთად უნდა დავსახოთ ის თუ პირველი რის გაკეთებას ვაპირებთ. ბუნებრივია ყველა მოქალაქეს პრობლემას ვერ გადავუწყვეტთ, მაგრამ კარი არ უნდა მივუხუროთ, უნდა მოვსუმინოთ და პასუხი გავცეთ თუ რისი გაკეთება შეგვიძლია“.

მოქალაქეებთან ურთიერთობის მიზნით ზედგინიძე ადგილობრივ მედიასთანაც აქტიურ თანამშრომლობას აპირებს: „აუცილებლად ვითანამშრომლებ თქვენთან. ხანდახან შეიძლება რომ ჩვენ გადაცემაც კი მოვაწყოთ ერთად „ შეკითხვა მერს“ და თქვენ ერთად ვუპასუხოთ ხალხს“.

[თამუნა უჩიძე, ახალციხე]