ვალის კულტურის სახლს რეაბილიტაცია ჩაუტარდება

ვალეს კულტურის სახლი. ფოტო "სამხრეთის კარიბჭეს" არქივიდან.

ახალციხის მუნიციპალიტეტის ქალაქ ვალის კულტურის სახლი სახელმწიფოს ბალანსზე იყო. გამგეობის მოთხოვნით, შენობა მუნიციპალიტეტის ბალანსზე 17 მარტს, ეკონომიკის სამინისტროდან მოსული ბრძანების საფუძველზე გადავიდა.

„ვალეში არსებული კულტურის სახლი და სოფლის კლუბი სახელმწიფოს ბალანსზე იყო, ჩვენი თხოვნით კულტურის სახლზე გამოიცა ბრძანება, რომლის შემდეგაც ვალის კულტურის სახლი უკვე ჩვენს ბალანსზე გადმოვიდა“, – განმარტავს ახალციხის მუნიციპალიტეტის გამგებელი ზაზა მელიქიძე.

მიმდინარე წელს კულტურის სახლის რეაბილიტაცია იგეგმება. როდის დაიწყება სამუშაოები და რა თანხა გამოიყოფა ამისთვის, ჯერ უცნობია.

„გვინდა, რომ შევინარჩუნოთ მისი იერსახე. ვფიქრობ, რომ ეს ისტორიული შენობაა და უნდა აღდგეს“, – ამბობს გამგებელი.

ვალის კულტურის სახლი, რომელიც ქალაქის ცენტრში მდებარეობს ავარიულია, ჩამტვრეულია მინები და დაზიანებულია სახურავი, საიდანაც წვიმის დროს შენობაში წყალი ჩადის. მიუხედავად ამისა, კულტურის სახლში სხვადასხვა წრეები ფუნქციონირებს.

[თამარ თოთაძე, ახალციხე]