რატომ დაემუქრა თანამშრომლებს გამგებლის მრჩეველი

ახალციხის მუნიციპალიტეტის გამგეობაში აცხადებენ, რომ ქალაქში 10-მდე ავარიული შენობაა. ახალციხის მუნიციპალიტეტის გამგებლის მრჩევლის გოჩა პარუნაშვილის თქმით, ქალაქში არსებული ავარიული შენობების შესახებ გამგეობა თავად დაინტერესდა, აღნუსხა და ეკონომიკისა და ინფრასტრუქტურის სამსახურს რეაგირებისთვის გადასცა.

”უნდა გაირკვეს რამდენად კანონიერადაა ეს მშენებლობები შესრულებული, ასევე, რამდენად კანონიერია მათზე გაკეთებული მიშენებები”, - აცხადებს პარუნაშვილი და ამატებს, რომ აღნიშულ საკითხთან დაკავშირებით საჭიროა სასწრაფო რეაგირება - მსგავსი ავარიული შენობების შესახებ დავალება მივეცით შესაბამის სამსახურებს. ასეთი შენობების შესახებ უნდა დაიწეროს დასკვნა”.

”რა კავშირში ვართ ჩვენ წლების წინ აგებულ შენობებთან?” - დავალება დაუკვირდა ეკონომიკისა და ინფრასტრუქტურის სამსახურის უფროსს თენგიზ ზედგინიძეს.

”იმ კავშირში ვართ, რომ ყველა იმ შენობაზე, რომელთა სიაც გადმოგეცით, ფაქტობრივად უკანონოდაა მიშენებული. ასევე, საფრთხის შემცველია და ნებისმიერ წამს შეიძლება ვინმე დაშავდეს”, - უპასუხა ზედგინიძეს პარუნაშვილმა.

ზედგინიძის თქმით, როცა შენობა ძალიან ძველია, ის რეესტრში დარეგისტრირებული შესაძლოა არც იყოს: ”საფუძველი არ გვაქვს, რა დავწერო?! ვის რა მოვთხოვო?! ეს არის კერძო საკუთრება. ამიტომ არანაირი საფუძველი არ მაქვს, ვინმეს რამის გაკეთება დავავალდებულო”.

პარუნაშვილის განცხადებით, კი საფუძველად ისიც კმარა, რომ აღნიშნული შენობები საფრთხის შემცველია.

”ჩამოვარდება და მოგკლავს. ასევე, ამახინჯებს ქალაქის იერსახეს, რას ნიშნავს არ გვაქვს საფუძველი?! სამი რამ გითხარით, რაც სწორედაც რომ საფუძველია, ერთ-ერთს გამოიყენებ. ახალი სისხლით ვიწყებთ მუშაობას, ვინც გამოგვყვება, გამოგყვება, ვინც არადა, კარგად იყავით ყველა. გამგებლის პოზიციას ვახმოვანებ”, - განაცხადა თათბირზე პარუნაშვილმა და დაამატა, - 4-5 კაცი ვერ ავაშენებთ ქვეყანას”.
მისივე თქმით, თუ კონკრეტული ღონისძიებები დროულად არ იქნება გატარებული კერძო მესაკუთრეების მხრიდანაც და ხარვეზებს არ გამოსწორებენ, შესაბამისი სანქციებით იმოქმედებენ.

[თამუნა უჩიძე, ახალციხე]