ძირგავარდნილი ურნების თემას ქალაქის მერი ეხმაურება

ნაგვის ურნების თემაზე ახალციხის მერმა გიორგი კოპაძემ დღეს, 5 თებერვალს, ადმინისტრაციულ შენობაში ახალაგზარდებთან შეხვედრისას ისაუბრა.

„ცნობილ ურნებთან დაკავშირებით მინდა განცხადება გავაკეთო. ურნები არ არის ის თემა, რომელზეც მერი უნდა აკეთებდეს განცხადებას, მაგრამ იმხელა აჟიოტაჟი ატყდა“, – ასე ქალაქის მერმა გიორგი კოპაძემ ახალგაზრდებთან შეხვედრის დაწყებისას განაცხადა.

მისი თქმით, ნაგვის ურნები ქალაქში ახალი დადგმულია, ვედროებს კი, რომლებიც მათშია ჩადგმული ძირი იმიტომ არ აქვს, რომ მათ ხალხი დაუდევრად ექცევა: „თქვენი ტოლები ან თქვენზე უფრო დიდები ასაფეთქებელ საშუალებებს ყიდულობენ და აგდებენ შიგ“.

გიორგი კოპაძის განცხადებით, ქალაქის მერიამ შესაძლოა ამ პრობლემის აღმოსაფხვრელად შინაგან საქმეთა სამინისტროს რაიონულ სამმართველოსაც მიმართოს: „მინდა, რომ ვინც ამას აკეთებს, თავისი შეგნებით მივიდეს იქამდე, რომ აღარ უნდა გააკეთოს. თორემ თუ ეს პროცესი არ შეჩერდა, ცოტა სხვანაირად მოვიქცევით, შსს–ს რაიონულ სამმართველოს მივმართავთ. დაჭერა და ადამიანის დაჯარიმება ეს ბოლო გზაა, რასაც არ მივესალმები, მაგრამ თუ სხვა გზა არ დაგვიტოვეს ასეც მოვიქცევით“.

როგროც ქალაქის მერმა ახალგაზრდებთან შეხვედრისას განაცხადა, ქალაქში მეტი ახალი ნაგვის ურნა დაიდგმება, ასევე ქალაქს დაემატება ოთხი ახალი ნაგავმზიდი: „მოთხოვნა გვაქვს მტვერსასრუტზეც, რომელიც მტვერს აიღებს“.

შეგახსენებთ, რომ „სამხრეთის კარიბჭემ“ ახალ, მაგრამ უძირო ურნებთან დაკავშირებით სტატია 26 იანვარს გამოაქვეყნა. ადგილობრივი ბიუჯეტიდან 13.376 ლარი დაიხარჯა და ქალაქში 62 ურნა დაიდგა. ახალი ურნები ქუჩებზე 2015 წლის 14 დეკემბერს გაანაწილეს. ერთ თვეში კი სამ ურნას ძირი აღარ ჰქონდა. სტატიას სოციალურ ქსელში დიდი გამოხმაურება მოჰყვა.

[თამუნა უჩიძე, ახალციხე]