ახალციხეში რუსთაველის ქუჩიდან მესამე სკოლისკენ ავტომობილით შესვლა აიკრძალა

N3 საჯარო სკოლის მიმდებარედ, ქუჩის ორ წერტილში საგზაო ნიშანი – ,,შესვლა აკრძალულია“, 17 ნოემბერს დაიდგა. ნიშნების მიხედვით, რუსთაველის ქუჩიდან N3 საჯარო სკოლისაკენ შესვლა იკრძალება. ასევე აკრძალულია, მესამე საჯარო სკოლიდან, თუმანიანის ქუჩის გავლით, დიდიმამიშვილის ქუჩაზე გასვლა.



შესაბამისად, მესამე სკოლასთან მისვლა ავტომობილით შესაძლებელია მხოლოდ ერთი მიმართულებით – დიდიმამიშვილის ქუჩიდან თუმანიანის ქუჩის გავლით.

რუსთაველის ქუჩის დაახლოებით 50–მეტრიან მონაკვეთზე, სადაც N3 საჯარო სკოლა მდებარეობს, ორმხრივი მოძრაობის ცალმხრივად გადაკეთება თავად მაცხოვრებლებმა მოითხოვეს. ოქტომბრის შუა რიცხვებში, 16–მა ოჯახმა ახალციხის მერიას განცხადებით მიმართა, სადაც განმარტავდნენ, რომ ორმხრივი მოძრაობის გამო, მათი საცხოვრებელი სახლების წინ ავტომანქანების მოძრაობა ყოველთვის ინტენსიური იყო და ხშირად სახიფათო მდგომარეობა იქმნებობა, რადგან ამ ტერიტორიაზე, ყოველდღიურად, ასობით მოსწავლეს ფეხით გადაადგილება უხდება.

ამკრძალავი საგზაო ნიშნების დადგმის გადაწყვეტილება ახალციხის მერიამ და საპატრულო პოლიციამ ერთობლივად მიიღეს. ნიშნები 17 ნოემბერს დაიდგა, თუმცა მაცხოვრებლების განმარტებით, მძღოლები ნიშნებს ვერ ამჩნევენ და აკრძალვის მიუხედავად, სკოლის შენობამდე კანონდარღვევით გადაადგილდებიან.

"ახალი რომ არის ეს ამკრძალავი ნიშანი, მანქანები მაინც შემოდიან. ალბათ რამდენიმე დღე დასჭირდება, სანამ ხალხი მიხვდება და ისწავლის, რომ არ უნდა შემოვიდნენ. დილით საპატრულო პოლიცია დავინახე ამ ქუჩაზე, ალბათ თვითონვე მიიღებს პატრული გადაწყვეტილებას, რომ დილის საათებში მაინც იმოძრაონ ამ ქუჩაზე“– ამბობს რუსთაველის ქუჩის მაცხოვრებელი ნინო რუხაძე.

მაცხოვრებლების ნაწილი კი ფიქრობს, რომ უმჯობესი იქნებოდა თუკი ამკრძალავი ნიშანი დიდიმამიშვილის ქუჩასთან დაიდგმებოდა და შესვლა ამ მიმართულებით აიკრძლებოდა.

"ჩვენი მოთხოვნა იყო, რომ დაედგათ, მაგრამ არასწორად დააყენეს. ზამთარში როგორ უნდა შემოვიდეს აქ მანქანა, იქიდან შემოსვლა პრობლემა იქნება გზა თუ გაიყინა. იმიტომ, რომ დიდიმამიშვილის ქუჩის შემოსასვლელიდან აღმართია და თუ გაიყინა ვერც შემოხვალ და ვეღარც გახვალ აქედან“ – ამბობს ერთ–ერთი მაცხოვრებელი.



[თაკო ფეიქრიშვილი, ახალციხე]