მესამე საჯარო სკოლის მიმდებარედ ავტომობილების მოძრაობის შეზღუდვას ითხოვენ

ქალაქ ახალციხის #3 საჯარო სკოლის მიმდებარედ, რუსთაველის ქუჩის დაახლოებით 50 მეტრიან მონაკვეთზე, ამ დროისათვის, ორმხრივი მოძრაობაა. ქუჩის ამ მონაკვეთზე, ავტომანქანებს უფლება აქვთ იმოძრაონ როგორც დიდიმამიშვილის ქუჩიდან, ასევე რუსთაველის ქუჩიდან.
სკოლის მიდებარედ, აღნიშნულ მონაკვეთზე მცხოვრები მოსახლეობა ამბობს, რომ ორმხრივი მოძრაობის გამო, მათი საცხოვრებელი სახლების წინ ავტომანქანების მოძრაობა ყოველთვის გადატვირთულია და ხშირად სახიფათო მდგომარეობა იქმნება. მით უფრო, რომ ამ ტერიტრიაზე ყოველდღიურად ასობით მოსწავლე ფეხით მოძრაობს.

მათივე განმარტებით, ქუჩაზე მდგომარეობა მას შემდეგ უფრო გაუარესდა, რაც პირველ საჯარო სკოლაში მიმდინარე სარემონტო სამუშაოების გამო, მოსწავლეებს გაკვეთილები მესამე საჯარო სკოლაში, მეორე ცვლაში უტარდებათ. შესაბამისად, დილიდან საღამოს 19:00 საათამდე ქუჩაზე თავისუფლად გადაადგილება შეუძლებელია.

,,როდესაც სახლიდან გავდივართ ადგილობრივი მაცხოვრებლები, ხშირად ბავშვებს სკოლაში ვაგვიანებთ. მანქანების დიდი ნაკადი ორივე მხრიდან მოდის. რომ ვერ ეტევა მანქანები, ხშირად ხდება საავარიო სიტუაციები, უსწრებენ მანქანები ერთმანეთს. გარდა ამისა, აქ ბავშვებიც მოძრაობენ, სკოლაა გვერდით და ძალიან სახიფათოა“,– ამბობს რუსთაველის ქუჩის მაცხოვრებელი ნინო რუხაძე.

პრობლემის მოსაგვარებლად, ნინო რუხაძემ მეზობლებთან ერთად, ახალციხის მერიას განცხადებით მიმართა. მცხოვრებლები ითხოვენ ორმხრივ მოძრაობიანი გზის ცალი მხარე ჩაიკეტოს და მოძრაობა ქუჩის ამ მონაკვეთზე ცალ მხრივი გახდეს.

განცახდებას ხელი 16–მა ოჯახმა მოაწერა და მერიაში ოქტომბრის შუა რიცხვებში წარადგინეს.

,, რი მანქანა გვყავს და აქ ადგილი არ არის ხოლმე რომ გავაჩეროთ. თვითონ სკოლის ავტობუსიც კი ვერ მოდის ადგილზე. ხელი მოვაწერე იმ განცხადებას, რომ ცალმხრივი გახდეს მოძრაობა“, –ამბობს მარიეტა ეპრანოსიანი.

მეზობელს ეთანხმება სუსანა კილოსიანიც, რომლის საცხოვრებელი სახლის კარიც პირდაპირ ქუჩაში გამოდის: „ზოგჯერ იმდენი მანქანა დგას, რომ სახლში ვერ შევდივარ. დილით მაინც, ძალიან გადატვირთულია მოძრაობა“.

განცხადების საპასუხო წერილი, რუსთაველის ქუჩის მაცხოვრებლებს ადგილობრივი თვითმმართველობიდან 6 ნოემბერს მიუვიდათ. წერილში განმარტებულია, რომ მერია ამ საკითხზე საპატრულო პოლიციასთან ერთად მუშაობს და გადაწყვეტილებას აუცილებლად გამოიტანს.
,,მერია კონსულტაციას გადის საპატრულო პოლიციასთან და უახლოეს მომავალში გადაწყდება ეგ საკითხი ან დადებითად, ან უარყოფითად“, – განუმარტეს „სამხრეთის კარიბჭეს“ ქალაქ ახალციხის მერიაში.

ადგილობრივები ამბობენ, რომ ცალმხრივი მოძრაობა ქუჩას ნაწილობრივ განტვირთავს. მაგრამ თუკი მერიასა და საპატრულო პოლიციას არგუმენტირებული პასუხი ექნებათ, რომ ქუჩის ჩაკეტვა არ შეიძლება, აქ მცხოვრებლები მოძრაობის შეზღუდვას დროებით მოითხოვენ, იქამდე, ვიდრე პირველ სკოლაში სარეაბილიტაციო სამუშაოები დასრულდება და მოსწავლეების ნაწილი საკუთარ სკოლას დაუბრუნდება.









[თაკო ფეიქრიშვილი, ახალციხე]