ახალარჩეული მერები მუშაობას 12 ნოემბრიდან დაიწყებენ

ცესკოს ინფორმაციით, 2017 წლის 21 ოქტომბრის თვითმმართველი ქალაქის/თვითმმართველი თემის მერის არჩევნების პირველი ტურის შედეგად 64-დან არჩეულია 58 მერი. ყველა მათგანი მუშაობას 12 ნოემბრიდან დაიწყებს (საარჩევნო კანონმდებლობის თანახმად, არჩევნების შედეგების შემაჯამებელი ოქმის შედგენიდან მე-11 დღეს).

ცესკოს ცნობით, ზემოაღნიშნული 58 თვითმმართველი ქალაქის/თვითმმართველი თემის მოქმედი მერები და გამგებლები საკუთარ უფლებამოსილებას 11 ნოემბრის ჩათვლით ახორციელებენ.

სამცხე–ჯავახეთის ექვსი მუნიციპალიტეტიდან, ახალი მერი მუშაობას 12 ნოემბერს ხუთ მუნიციპალიტეტში შეუდგება. ახალციხეში მუშაობას დაიწყებს – ზაზა მელიქიძე; ადიგენში – ზაქარია ენდელაძე; ასპინძაში – როსტომ მაგრაქველიძე; ახალქალაქში – იურიკ უნანიანი; ნინოწმინდაში – ანივარდ მოსოიანი. ბორჯომში კი მეორე ტური უნდა გაიმართოს. მეორე ტურში ერთმანეთს "ქართული ოცნების" კანდიდატი ლევან ლიპარტია და "პატრიოტთა ალიანსის" კანდიდატი ზაზა ჩაჩანიძე უპირისპირდებიან. პირველ ტურში ლიპარტიამ ამომრჩეველთა ხმების – 40.35%, ჩაჩანიძემ კი 40.15% მიიღო. მათ შორის განსხვავება მხოლოდ 24 ხმაა.

ცესკოს ინფორმაციით, თვითმმართველი ქალაქის/თვითმმართველი თემის მერის 2017 წლის 21 ოქტომბრის არჩევნების მეორე ტური 12 ნოემბერს 6 საარჩევნო ოლქში გაიმართება. ამომრჩეველი აირჩევს თვითმმართველი ქალაქის - ქუთაისის და თვითმმართველი თემების: ყაზბეგის, ხაშურის, ბორჯომის, ოზურგეთისა და მარტვილის მუნიციპალიტეტის მერებს.

[sknews.ge]