ვაჟა ჩიტაშვილი: რაც მინდოდა ამ არჩევნებიდან, მივიღე

პირველი და მეორე ტურის შედეგებს შორის დიდ სხვაობას ვაჟა ჩიტაშვილი რამდენიმე ფაქტორს უკავშირებს.

„საზოგადოებამ ორი კვირის წინ მე დამიჭირა მხარი. არ ვიცი ამ პრიოდის განმავლობაში რა უნდა მომხდარიყო რომ ასე შეეცვალათ აზრი, ყველაფერი იმის ბრალია, რომ მოსახლეობაზე ინდივიდუალურად მიმდინარეობდა ზეწოლა და ამაზე არაერთხელ ვისაუბრე“, - ამბობს ვაჟა ჩიტაშვილი, რომელმაც პირველ ტურში ხმების 44,07% , მეორე ტურში კი 30,17% მიიღო და არჩევნებში დამარცხდა.

კენჭისყრის შედეგები მისთვის მოულოდნელი არ ყოფილა: „ბოლო დღეების ანალიზის შედეგად, ამას ველოდი. ისე წავიდა საქმე, არჩევნებში მონაწილეობას აზრი აღარ ჰქონდა“.

თუმცა, არჩევნებში მონაწილეობაზე უარი არ თქვა და ეს გადაწყვეტილება გუნდური პრინციპებიდან და საზოგადოების ნდობიდან გამომდინარე მიიღო. რომელი უბნები მოიგო და წააგო, მისთვის მნიშვნელოვანი არ არის და თავს გამარჯვებულად მიიჩნევს: „მე რაც მინდოდა ამ არჩევნებიდან, ხალხის ნდობა და სიყვარული, მივიღე. მიუხედავად იმისა რომ დეპუტატი არ ვიქნები, მათ ყურადღებას ყოველთვის მივაქცევ“.

სად და როგორ გააგრძელებს საქმიანობას, ჯერ პასუხი არ აქვს. რაც ზუსტად იცის, პოლიტიკაში რჩება და პარტიულ მუშაობას აგრძელებს.
არჩევნების შემდეგ, ჩვეულებრივ რეჟიმში გააგრძელებს მუშაობას „ნაციონალური მოძრაობის“ რაიონული ორგანიზაციაც.

შეგახსენებთ, რომ საპარლამენტო არჩევნების მეორე ტურში, ერთმანეთს „ნაციონალური მოძრაობისა“ და „ქართული ოცნების“ კანდიდატები დაუპირისპირდნენ. ხმათა უმრავლესობა, 70,21%, „ქართული ოცნების“ კანდიდატმა მოიპოვა, ვაჟა ჩიტაშვილმა ხმების 30,17% მიიღო.

[ლუბა გიორგაძე, ახალციხე]