'ჩემი კანდიდატურა განიხილება' – ვაჟა ჩიტაშვილი საპარლამენტო არჩევნებზე

ვაჟა ჩიტაშვილის თქმით, ოქტომბრის საპარლამენტო არჩევნებისთვის, მისი კანდიდატურა ახალციხე–ადიგენი–ასპინძა–ბორჯომის მაჟორიტარულ ოლქში განიხილება.

„საუბარი მიდის ამ თემაზე, კანდიდატებს შორის განვიხილები, ჯერ ოფიციალური წარდგენა არ ყოფილა“, – ამბობს იგი.

6 აგვისტოს, მედიაში გავრცელდა ინფორმაცია, რომ „ნაციონალური მოძრაობიდან“ ახალციხე-ადიგენი-ასპინძა-ბორჯომის ოლქში ვაჟა ჩიტაშვილი იქნებოდა, ახალქალაქი-ნინოწმინდის ოლქში კი – მელიქ რაისიანი.

მაშინ, „სამხრეთის კარიბჭესთან“ ვაჟა ჩიტაშვილმა, ინფორმაცია არ დაადასტურა და „ჭორი“უწოდა: „მე ვარ იურისტი და ფაქტებით ვხელმძღვანელობ“.

ჩიტაშვილი 2016 წლის საპარლამენტო არჩევნებში, ისევ „ნაციონალური მოძრაობიდან“, ახალციხე–ადიგენის მაჟორიტარულ ოლქში იყრიდა კენჭს.

არჩევნების პირველ ტურში, ჩიტაშვილმა „ქართული ოცნების“ კანდიდატზე, გიორგი კოპაძეზე მეტი ხმა დააგროვა, მაგრამ მეორე ტურში გამარჯვება კოპაძემ მოიპოვა.

16 აგვისტოს მონაცემებით, რეგიონში მაჟორიტარი დეპუტატობის კანდიდატები, ორ პოლიტიკურ პარტიას ჰყავს დასახელებული, ესენია "ქართული ოცნება" და "ევროპული საქართველო".

"ქართული ოცნების" სახელით სამცხე–ჯავახეთში ანტონ ობოლაშვილი და სამველ მანუკიანი იბრძოლებენ, ობოლაშვილი ახალციხე–ადიგენი–ასპინძა–ბორჯომის მაჟორიტარულ ოლქშია წარდგენილი, მანუკიანი კი ნინოწმინდა-ახალქალაქში.

რაც შეეხება "ევროპულ საქართველოს", მას კანდიდატი მხოლოდ ნინოწმინდა–ახალქალაქში ჰყავს და ეს არსენ კარაპეტიანია.

საპარლამენტო არჩევნები საქართველოში 2020 წლის ოქტომბერში ჩატარდება.