"თავისუფალმა დემოკრატებმა" საუბნო კომისიების წევრები გაიწვიეს

არჩევნების მეორე ტურის წინ, N44 ახალციხე–ადიგენის მაჟორიტარულ ოლქში, საარჩევნო უბნებზე კომისიების შემადგენლობა უმნიშვნელოდ, მაგრამ მაინც შეიცვალა.

პარტია „თავისუფალმა დემოკრატებმა“ საარჩევნო უბნებიდან კომისიის წევრები გაიწვიეს, თუმცა მათ ადგილზე არავინ ჩაუნაცვლებიათ. პარტიამ 12 წევრი ახალციხის, 6 კი ადიგენის უბნებიდან გაიწვია.

„თავისუფალი დემოკრატების“ წევრი, ყოფილი მაჟორიტარობის კანდიდატი, ასევე, ქალაქ ახალციხის საკრებულოს დეპუტატი შალვა გოგოლაძე აცხადებს, რომ უბნებიდან წევრების გაწვევა ცენტრალურ ოფისში გადაწყდა.

„ზოგადად ვიცი, რომ იქ სადაც 10 ხმაზე ნაკლები იყო უბანზე, ეჭვები აქვთ, რომ რაღაც გარიგებები იყო, აქედან გამომდინარე გააკეთეს. მე არ ვარ ჩარეული ამ გადაწყვეტილებაში“, – ამბობს შალვა გოგოლაძე.


არჩევნების მეორე ტურის ჩატარებამდე, ცენტრალური საარჩევნო კომისიის N69 დადგენილებით, პოლიტიკურ პარტიებს შესაძლებლობა ჰქონდათ საარჩევნო უბნებიდან გაეწვიათ ან ჩაენაცვლებინათ კომისიის წევრები. დადგენილების მიხედვით საუბნო საარჩევნო კომისიის წევრის გამოწვევა აკრძალულია მეორე ტურის გამართვის შემთხვევაში კენჭისყრის დღემდე არაუგვიანეს მე-4 დღისა. ამავე დადგეილების მიხედვით, თუ პარტია გაიწვევს წევრს და აღარ ჩაანაცვლებს, საოლქო კომისია უფლებამოსილია წევრები კონკურსის წესით შეარჩიოს.

ახალციხის საოლქო კომისიამ ახალი წევრების ასარჩევად კონკურსი დღეს 28 ოქტომბერს გამოაცხადა. ახალი წევრები ერთი დღის ვადაში უნდა შეირჩნენ.

შეგახსენებთ, რომ მეორე ტური ახალციხე–ადიგენის მაჟორიტარულ ოლქში კვირას, 30 ოქტომბერს ჩატარდება. ამავე დღეს ჩატარდება ახალციხის მერის რიგგარეშე არჩევნებიც. ორივე შემთხვევაში გამარჯვებისთვის „ქართული ოცნების“ და „ერთიანი ნაციონალური მოძრაობის“ კანდიდატები იბრძოლებენ. ორივე შემთხვევაში პირველ ტურში „ნაციონალური მოძრაობის“ კანდიდატებმა გაიმარჯვეს.

N44 ახალციხე–ადიგენის მაჟორიტარულ ოლქში 53 საარჩევნო უბანია. მერის არჩევნებისთვის კი ახალციხეში 13 უბანი იქნებაა.

[თინათინ ზაზაძე, ახალციხე]