არჩევნებამდე ოთხი დღით ადრე, ახალციხის მერობის კანდიდატი „ქართული ოცნებიდან“ ვლადიმერ ზედგინიძე არასამთავრობო სექტორის, მედიის წარმომადგენლებსა და მხარდამჭერებს შეხვდა. შეხვედრა, რომელიც ორი საათის განმავლობაში გაგრძელდა დებატების რეჟიმში უნდა ჩატარებულიყო, თუმცა „ნაციონალური მოძრაობის“ კანდიდატმა ირაკლი ერეკლიშვილმა მასში მონაწილეობაზე უარი განაცხადა.
ახალციხის დემოკრატიული ჩართულობის ცენტრის ორგანიზებით ჩატარებულ შეხვედრას მედია ექსპერტი ზვიად ქორიძე უძღვებოდა.
მერობის კანდიდატმა ვლადიმერ ზედგინიძემ გამარჯვების შემთხვევაში ახალციხეში სოციალური საკითხების მოგვარებასა და ტურიზმის განვითარებაზე ისაუბრა.
„არის შესაძლებლობა პირველ რიგში ქალაქის კეთილმოწყობის. ტურიზმისთვის ეს არის მნიშვნელოვანი, სხვა ერთი წლის განმავლობაში ჩვენ ვერაფერს ვერ შევქმნით არსებითს. შეიძლება ინვესტორების მოძიება, თუმცა ის თანხას ჩვენს ქალაქში მაშინ ჩადებს, როდესაც რაღაცის პერსპექტივას დაინახავს“, – განაცხადა ახალციხის მერობის კანდიდატმა ვლადიმერ ზედგინიძემ.
შეხვედრის მონაწილეებმა მერობის კანდიდატს უმუშევრობის შემცირებაზე, ცენტრალურ ქუჩებში პარკირების პრობლემებზე, საქალაქო ტრანსპორტის მოუწესრიგებლობაზე, სტუდენტური საცხოვრებლის არარსებობასა და წყლის მაღალ ტარიფზე დაუსვეს კითხვები.
„ტრანსპორტი ახალციხეში მოძველებულია, თუ იგეგმება ახალი ტრანსპორტის შემოყვანა, თუნდაც ღია ტრანსპორტის ტურისტებისთვის და იმ შემთხვევაში თუ თქვენ გახდებით მერი, რას გააკეთებთ 1 წლის განმავლობაში, რომ უფრო მეტი სამუშაო ადგილი შეიქმნას?“, – ჰკითხა კანდიდატს სამცხე–ჯავახეთის სახელმწიფო უნივერიტეტის მეოთხე კურსის სტუდენტმა ზინა მურჯიკნელმა.
ვლადიმერ ზედგინიძის განმარტებით შესაძლია ახალციხის მერიამ რამდენიმე ახალი ავტობუსი შეიძინოს, ან თბილისის მერიას იმ ავტობუსების გადმოცემა სთხოვს, რომელსაც თბილისის მერია აღარ გამოიყენებს.
რაც შეეხება სამუშაო ადგილების შექმნას, მერობის კანდიდატის განმარტებით, დაახლოებით 15–20 სტუდენტის „ახალციხის ციხეზე“ გიდებად დასაქმებას გეგმავს, თუმცა როგორ, ეს არ დაუკონკრეტებია: „ვინც ფლობს რამდენიმე ენას, გადმოცემის უნარს, ძალიან დიდი მნიშვნელობა ექნება“.
არასამთავრობო ორგანიზაციების წარმომადგენლებმა ყურადღება უმოქმედოდ დატოვებულ შენობებზე გააკეთეს, რომლებიც ეკონომიკის სამინისტროს ბალანსზეა. მათი განმარტებით, შესაძლებელია მათი გადმოცემით ქალაქში ბევრი სასიკეთო რამ გაკეთდეს, თუმცა ამას ადგილობრივი თვითმმართველობა არ აკეთებს.
„ეკონომიკის სამინისტროში ჩვენი სამსახური სვამდა კითხვებს, შესაბამის დეპარტამენტებში განგვიმარტეს, რომ არანაირი მიმართვა, დასაბუთებული, მუნიციპალიტეტებიდან მათთან არ მიდის. როდესაც არის შენობა, რომელსაც სამინისტრო არ იყენებს, არა მგონია უარი თქვან გადმოცემაზე. იყო შემთხვევები, ჩვენ ვაფინანსებდით ბაღებს, ფულს ვაძლევდით მუნიციპალიტეტებს და ისინი ვერ ახერხებდნენ კომუნიკაციას, რომ შენობები გადმოცემულიყო მათზე. თქვენ რას გააკეთებთ ამ მიმართულებით?“ – იკითხა ნინო რუხაძემ.
ვლადიმერ ზედგინიძის თქმით, გამარჯვების შემთხვევაში წლის ბოლომდე, ეკონომიკის სამინისტროსთან მოლაპარაკებასაც და ქონების გადმოცემასაც მოასწრებს, თუმცა მანამდე თანამშრომლებთან ერთად ვითარებაში გაერკვევა: „სხვათაშორის ძალიან ენერგიული კაცი ვარ“.
კანდიდატის განმარტებით, ადგილობრივი თვითმმართველობის უფრო ნაყოფიერად და ეფექტურად მუშაობისთვის აუცილებელია ადგილობრივი თვითმმართველობის კანონი გადაიხედოს. უნდა შეიცვალოს სატენდერო პირობებიც: „2 მეტრზე ასფალტი რომ დააგო, ტენდერი უნდა გამოაცხადო, ტენდერში უფრო მეტი თანხა იხარჯება, ვიდრე რეალურად ასფალტის დასხმას სჭირდება. ტენდერი უნდა გამოაცხადო, როდესაც 10–15 ათას ლარს სცილდება. წინააღმდეგ შემთხვევაში სისტემა ხდება მოუქნელი და ეს მოსახლეობის უკმაყოფილებას იწვევს“.
მისი თქმით, ადგილობრივი მოსახლეობის პრობლემების მოგვარებაზე და ქალაქის მერობაზე იმ შეთხვევაში დათანხმდება, თუ ამომრჩევლის უმრავლესობა მხარს მის კანდიდატურას დაუჭერს.
„მე თუ მექნება უფლებამოსილება 50%+1, და არა 1000, მაშინ მე იმ სამსახურში არ შევალ. არ შევალ თუ ლეგიტიმაცია არ მექნა სრულად, იმდენი, რამდენსაც ვიმსახურებ. ეს კი ამომრჩეველმა უნდა განსაზღვროს. ამომრჩეველი მე მიცნობს, შეიძლება ეს თამამი განცხადებაა, მაგრამ, მე მეკუთვნის“, – განაცხადა ვლადიმერ ზედგინიძემ.
სამცხე–ჯავახეთის სახელმწიფო უნივერისტეტის ლექტორი მალხაზ ლომსაძე დაინტერესდა გამარჯვების შემთხვევაში აპირებდა თუ არა კანდიდატი მერიაში საკადრო ცვლილებების გატარებას.
კანდიდატის განმარტებით, სწორედ მაგ კითხვის დასმამ დააკარგვინა ახალციხის მერიის თანამშრომლების ხმების უმეტესობა.
„მეორე ტური ჯერ გასავლელი მაქვს. 743 თანამშრომელი ყავს ქალაქის მერიას, უმეტესობამ მე მხარი არ დამიჭირა ზუსტად მაგ შეკითხვის გამო. მე ჯერ არ ვარ მერი, ამიტომ კადრებზე ნუ მეკითხებით, იმიტომ, რომ იქ(მერიაში) შევიდა ხმა, რომ მოდის „მგელი“,“ბუა“ და უმეტესობამ მხარი არ დამიჭირა. იმუშავეს ჩემს საწინააღმდეგოდ მერიის თანამშრომლებმა და ზოგმა ხელმძღვანელმა“, – განაცხადა ვლადიმერ ზედგინიძემ.
გარდა აღნიშნულისა, ვლადიმერ ზედგინიძე ფიქრობს, რომ მისი მეორე ადგილზე გასვლა კიდევ რამდენიმე ფაქტორმა განაპირობა: „ჩემი თვითდაჯერებულობა და შესაბამისად, ცოტაც ღალატი. მიღალატეს იმიტომ, რომ მე მჯეროდა და მწამდა, რომ ღირსეულს მისცემდნენ ხმას“.
შეგახსენებთ, რომ 8 ოქტომბრის საპარლამენტო არჩევნებში ახალციხის მერობისთვის 5 კანდიდატი იბრძოდა, იმის გამო, რომ ვერცერთმა მათგანმა ხმების 50%–იანი ზღვარი ვერ გადალახა მეორე ტური დაინიშნა.
30 ოქტომბერს დანიშნულ მეორე ტურში გამარჯვებისთვის „ქართული ოცნების“ კანდიდატი ვლადიმერ ზედგინიძე და „ნაციონალური მოძრაობის“ კანდიდატი ირაკლი ერეკლიშვილი იბრძოლებს.
ირაკლი ერეკლიშვილმა ახალციხის 13 საარჩევნო უბნიდან, 11 უბანზე მოუგო და ამომრჩეველთა ხმების 45.98% მიიღო, ვლადიმერ ზედგინიძემ კი 36.99%.
[თინათინ ზაზაძე, ახალციხე]