ირაკლი ერეკლიშვილი: „ზეწოლა რომ არ ყოფილიყო, „ოცნება“ უფრო ცოტა ხმას მიიღებდა“

ახალციხის მერობის კანდიდატი „ერთიანი ნაციონალური მოძრაობიდან“ ირაკლი ერეკლიშვილი, რომელმაც ყველაზე მეტი ხმა მიიღო, არჩევნების შედეგბით კმაყოფილია.

„მადლობა მინდა ვუთხრა ყველას, ისე როგორც ჩემ ამომრჩეველს, ასევე, იმასაც, ვინც ვოვა ზედგინიძეს მისცა ხმა, ყველა თავის არჩევანს აკეთებს“, – ამბობს ირაკლი ერეკლიშვილი.

მისი განცხადებით, ყველა უბანთან ადგილობრივი თვითმმართველობის წარმომადგენლები იმყოფებოდნენ და ამომრჩეველზე „ოცნების“ სასარგებლოდ ზეწოლას ახორციელებდნენ.

„ზეწოლა რომ არ ყოფილიყო, „ოცნება“ უფრო ცოტა ხმას მიიღებდა. მაგალითად, N4 ახალციხის უბანთან იყო მერიის თანამშრომელი ჰენრიხი, გვარი არ ვიცი სამწუხაროდ. მას ვთხოვე კიდეც, რომ უბნის მიმდებარე ტერიტორია დაეტოვებინა და თავი დაენებებინა ასეთი სახის ქმედებისთვის“, – ამბობს ერეკლიშვილი.

„ნაციონალური მოძრაობის“ კანდიდატი დარწუნებულია, რომ ხალხი როგორც არ უნდა შეაშინონ, მეორე ტურში მაინც გაიმარჯვებს: „ახალციხელებს ვერ შეაშინებენ“.

შეკითხვეზე, მისი აზრით, ვის დაუჭერს იმ ამომრჩევლის დიდი ნაწილი მხარს, რომელმაც ხმა არც „ნაციონალებს“ და არც „ოცნებას“ მისცა, ერეკლიშვილი გვპასუხობს: „რთული შეკითხვაა. ჩემ თავზე რომ ვილაპარაკო, მაღალფარდოვანი საუბარი გამომივა“.

რაც შეეხება, ერეკლიშვილის კონკურენტის, „ქართული ოცნებიდან“ ახალციხის მერობის კანდიდატის ვლადიმერ ზედგინიძის ბრალდებებს ამომრჩევლის მოსყიდვასა და უბნების „ნაციონალებით“ დაკომპლექტებაზე, ერეკლიშვილი ამას პროვოკაციას უწოდებს.

„ქალაქმა კარგად იცის ვინ ვისით იყო დაკომპლექტებული და ვინ ვის აფინანსებდა. მოსყიდვა რომ ყოფილიყო, ამას მთავრობა დაუშვებდა?! ეს პროვოკაციული საუბარია, ბატონი ვოვა ჩემი უფროსი მეგობარია და ამაზე აყოლას არ ვაპირებ“, – ამბობს ერეკლიშვილი.

შეგახსენებთ, 8 ოქტომბერს ახალციხის მერის რიგგარეშე არჩევნებზე „ქართული ოცნების“ მერობის კანდიდატმა ვლადიმერ ზედგინიძემ 36,99%, „ნაციონალური მოძრაობის“ მერობის კანდიდატმა ირაკლი ერეკლიშვილმა კი 45,98% მიიღო. მათ შორის მეორე ტური გაიმართება.

[თამუნა უჩიძე, ახალციხე]