ვლადიმერ ზედგინიძე: „არ დავმარცხებულვარ“

„ქართული ოცნებიდან“ ახალციხის მერობის კანდიდატი, რომელმაც „ნაციონალური მოძრაობის“ კანდიდატთან შედარებით, ხმების მცირე ოდენობა მიიღო, თავს დამარცხებულად არ მიიჩნევს.

„ვლადიმერ ზედგინძე არასდროს არ დამარცხებულა და არც დამარცხდება! დამარცხებული არ ვარ, მარათონში ვარ ჩართული“, – აცხადებს იგი, თუმცა ამატებს, რომ შედეგი მისთვის სასურველი არ იყო და მოლოდინი უფრო მეტის ჰქონდა.

ზედგინიძე აცხადებს, რომ არჩევნები სამართლიან გარემოში, ზეწოლისა და ადმინსიტრაციული რესურსის გამოყენების გარეშე ჩატარდა. რაც შეეხება იმას, თუ როგორ ხსნის იგი მიღებული ხმების შედარებით მცირე ოდენობას, ამ კონტექსტში ზედგინიძე ყურადღებას ორ მომენტზე ამახვილებს.

„მე მხოლოდ იმ ჩემ განვლილ გზას გამოვიყენებ, რომელიც გამაჩნია და ზოგიერთივით მოსყიდულად არ ჩავითვლები. თქვენ იცით კარიკარ სიარულისა და ფულის დარიგების ფაქტები. 30 ლარად გაყიდული ამომრჩეველი, მეც 30 ლარად გამყიდის. ვინც ფული დაარიგა, ისინი ვითომ ჩვენი კონკურენტები არიან“, – ამბობს „ქართული ოცნების“ მერობის კანდიდატი.

გარდა „ნაციონალების“ მხრიდან ამომრჩევლის მოსყიდვისა, ზედგინიძე სხვა ხელისშემშლელ ფაქტორზეც საუბრობს.

„საარჩევნო უბნები დაკომპლექტებული იყო „ნაციონალებით“. ის სია გადმოიტანეს პირდაპირ, რომლითაც არჩევნები ჩატარდა 2008 და 2012 წელებში. ჩვენ წარმომადგენელი გვყავდა მხოლოდ ერთი. არასამთავრობო ორგანიზაციებიც დაუდევრად იქცეოდნენ. ასპიტი ქალობა მიუღებელია არჩევნებზე“, – აცხადებს ზედგინიძე და ამატებს – „ალბათ მეტყვით, რომ ამის გაპროტესტება შეიძლებოდა, ან ოქმით დაფიქსირება, მაგრამ ერთი ადამიანი 16–ის წინააღმდეგ ცოტა ძნელია“.

შეკითხვაზე, თუ ოქმი დაიწერებოდა ის საოლქო კომისიაში განიხილებოდა, სადაც ერთი 16–ის წინააღმდეგ აღარ იქნებოდა და ასე რატომ არ მოიქცნენ, ზედგინიძე გვპასუხობს: „შანტაჟებზე არ წავსულვართ და ღმერთმა დაგვიფაროს. თან ეს შედეგსაც ვერ მოიტანდა. ვიღაცას მხარი ხომ უნდა დაეჭირა“.

რაც შეეხება შეკითხვას, დამოუკიდებელ კანდიდატად რომ ეყარა კენჭი უფრო მეტ ხმას მიიღებდა თუ არა, გვპასუხობს: „ვარ „ქართული ოცნების“ წარმომადგენელი და დავრჩები „ქართული ოცნების“ წარმომადგენლად. დამოუკიდებელი კანდიდატი რომც იყო, მაინც მმართველი, წარმატებული პარტიის აზრებით უნდა იხელმძღვანელო. მეტის მოლოდინი იყო, თუმცა „ქართულმა ოცნებამ“ წილობრივ თავისი ამოცანა მაინც შეასრულა“.

ზედგინიძე დარწმუნებულია, რომ მეორე ტურში გაიმარჯვებს, ამის საფუძველს კი როგორც თავად ამბობს პირველ რიგში ხალხის განწყობა აძლევს: „ვეცდები აქტიური და ცოტა უფრო კრიტიკული ვიყო იმ შესაძლებლობის მიმართ, რომლის იმედიც მქონდა. ასევე, ვეცდები უფრო კრიტიკული ვიყო იმ ჩემი მეგობრებისადმი, რომლებიც ოპოზიციურ მხარე აღმოჩნდნენ“.

შეგახსენებთ, 8 ოქტომბერს ახალციხის მერის რიგგარეშე არჩევნებზე „ქართული ოცნების“ მერობის კანდიდატმა ვლადიმერ ზედგინიძემ 36,99%, „ნაციონალური მოძრაობის“ მერობის კანდიდატმა ირაკლი ერეკლიშვილმა კი 45,98% მიიღო. მათ შორის მეორე ტური გაიმართება.

[თამუნა უჩიძე, ახალციხე]