მედიის გამოწვევები საარჩევნო პერიოდში – დისკუსია ახალციხეში

დისკუსია, ახალციხის დემოკრატიული ჩართულობის ცენტრში, ცენტრის ორგანიზებით მოეწყო. მედია ექსპერტმა ზვიად ქორიძემ ჟურნალისტებთან საპარლამენტო არჩევნების წინ, ქართული მედიის მუშაობა ზოგადად მიმოიხილა და იმ ტენდენციებზე ისაუბრა, რაც ამ პერიოდში გამოიკვეთა.

ზვიად ქორიძე მიიჩნევს, რომ წინასაარჩევნო პერიოდში მედია მუდმივად უნდა ცდილობდეს, დაეხმაროს ამომრჩეველს მისთვის მნიშვნელოვან ყველა კითხვაზე პასუხის მიღებაში. მან მაქსიმუმი უნდა გააკეთოს იმისთვის, რომ ამომრჩეველსა და პოლიტიკოსს, კანდიდატს ან პარტიას შორის, იყოს კომუნიკაცია, დისკუსია, წამოიწიოს ყველა საკითხმა და ყველა ის თემა, რაც მოქალაქეებ აწუხებთ, პოლიტიკოსის დღის წესრიგის თემა გახდეს.

„მოქალაქეები უფრო სწრაფი ნაბიჯებით განვითარებას ითხოვენ, ვიდრე ამას პოლიტიკოსები მიყვებიან. პოლიტიკოსებს ეშინიათ ახალი იდეების გამოტანა, იმიტომ, რომ ფიქრობენ შემთხვევით ამას ცუდად ხომ არ გაიგებს საზოგადოება და ვაკუუმში იკეტებიან. ამ დროს აღმოჩნდა, რომ გარეთ საზოგადოება ფიქრობს ამაზე. იმიტომ ეშინიათ პოლიტიკოსებს ამ თემებზე საუბრის, რომ ეს თემები არ არის მედიაში“, – ამბობს ზვიად ქორიძე და ამატებს, რომ ხშირად უნდა გაშუქდეს მსგავსი თემები მედიის მხრიდან, იმისთვის, რომ შემდგომ ამ საკითხებზე პოლიტკოსებმაც დაიწყონ ფიქრი და ეს მოხვდეს მათ საარჩევნო პროგრამებში.

მედია ექსპერტის აზრით, მედიის მუშაობა ასევე ძალიან მნიშვნელოვანია პოსტ საარჩევნო პერიოდში. მედიას ამ ეტაპზეც რჩება ბევრი გამოწვევა, მითუმეტეს, იმ მოცემულობაში, რაც 2016 წლის 8 ოქტომბრის საპარლამენტო არჩევნების შემდგომ მივიღეთ.

„მოქალაქეები, რომლებიც აკეთებენ არჩევანს , არ უნდა ჩავარდნენ ნიჰილისტურ მდგომარეობაში. მედიის საშუალებით მათი ხმა უნდა გახდეს საჯარო და მიაღწიოს პოლიტიკურ სპექტრამდე, მთავრობამდე, იმისთვის, რომ მათ პრობლემებს არ წაუყრუონ. ამიტომ საჭიროდ მიმაჩნია ყოველთვის, რომ ასეთი წყალგამყოფის დროს, როგორიც არის არჩევნები, ვისაუბროთ ხოლმე ახალ გამოწვევებზე“, – ამბობს ზვიად ქორიძე.

[თინათინ ზაზაძე, ახალიციხე]