დახურული შეხვედრა კონფლიქტების თემაზე

შეხვედრა, რომელიც სამხრეთის კავკასიის კონფლიქტების თემას ეძღვნებოდა, ახალციხის დემოკრატიული ჩართულობის ცენტრში ორ საათზე მეტ ხანს მიმდინარეობდა. პირველი ნაწილი მომხსენებლების გამოსვლებს დაეთმო, მეორე ნაწილი კი დარბაზში დასმულ შეკითხვებზე პასუხს.

ექსპერტმა პაატა ზაქარეიშვილმა, IWPR–ის კავკასიის პროგრამის დირექტორმა ბექა ბაჯელიძემ და „დემოკრატ მესხთა კავშირის“ დირექტორმა გიორგი ანდღულაძემ გარდა ზოგადად, სამხრეთ კავკასიაში არსებული კონფლიქტებისა, ყურადღება გაამახვილეს, მედიის მიერ გავრცელებულ დეზინფორმაციაზე, პროპაგანდაზე, უშუალოდ სამცხე–ჯავახეთში თავიდან აცილებულ დაპირისპირებებსა და უმცირესობების საკითხებზე.

შეხვედრას რეგიონში მოქმედი არასამთავრობო ორგანიზაციების წარმომადგენლები ესწრებოდნენ. დისკუსია, დახურული იყო, რაც იმას გულისხმობს, რომ მას მედიის წარმომადგენლები, როგორც მხოლოდ მონაწილეები ისე ესწრებოდნენ.

„ძირითადი აქცენტი რაც დღეს შეხვედრაზე გაკეთდა, ეს არის რეგიონული უსაფრთხოება. აქ არსებული პრობლემების გამო, ეს თემა ყოველთვის ყველას აწუხებს. გაოცებული ვარ დამსწრე საზოგადოების აქტიურობით, გამოთქმული მოსაზრებებით და დასმული შეკითხვებით“, – ამბობს ბექა ბაჯელიძე.

ერთ–ერთი მომხსენებელი გიორგი ანდღულაძე ფიქრობს, რომ ყველა ის თემა, რაც ქვეყნისთვის პრობლემას წარმოადგენს, მნიშვნელოვანია მასზე დისკუსია გაიმართოს: „ასეთი შეხვედრების დროს, ხანდახან ჩვენი შეხედულებების გადაფასებაც გვიხდება, ვიღებთ მეტ, ახალ ინფორმაციას. ასევე ვიგებთ რას ფიქრობენ დედაქალაქში ჩვენზე“.

დისკუსია ტარდება პროექტის "სამხრეთ კავკასიაში მშვიდობის, უსაფრთხოებისა და სტაბილურობის ახალი არქიტექტურის ფორმირება’’ ფარგლებში, რომელიც ხორციელდება დიდი ბრიტანეთის მთავრობის ფინანსური მხარდაჭერით.



[თამუნა უჩიძე, ახალციხე]