მესხეთის მედიასაშუალებების მუშაობით საქართველოს ჟურნალისტთა დამოუკიდებელი ასოციაცია დაინტერესდა

ახალციხისა და ბორჯომის მედია-საშუალებების ჟურნალისტებთან შეხვედრა დღეს,24 თებერვალს, ახალციხეში შედგა.

დისკუსია ჟურნალისტთა უსაფრთხოების სახელმძღვანელოს, სახელწოდებით „რისკის ქვეშ“, პრეზენტაციით დაიწყო. სახელმძღვანელო საქართველოს ჟურნალისტთა დამოუკიდებელი ასოციაციისა და ჟურნალისტთა საერთაშორისო ფედერაციის მიერ გამოიცა.

სახელმძღვანელოს ავტორები ბესო მამინაიშვილი, გენო ჯოხიძე და ზვიად ფოჩხუა არიან. მათი განმარტებით, სახელმძღვანელოში აღწერილია ის პრობლემები და გამოწვევები, რომელთა წინაშეც შეიძლება აღმოჩნდეს როგორც ზოგადად ქართული მედია, ისე ნებისმიერი ჟურნალისტი.

„წიგნში საუბარია ჟურნალისტებზე ფსიქოლოგიურ ზეწოლებზე, ფიზიკურ უსაფრთხოებაზე, იურიდიულ საფრთხეებზე, ეკონომიკურ საფრთხეებზე და ინფორმაციის მიღება-გავრცელებაზე. გვინდა, რომ ამ სახელმძღავენელოთი ჟურნალისტებს დავანახოთ უკეთესი გზა თუ როგორ შეიძლება აღნიშნული რისკები დავიყვანოთ მინიმუმამდე“,- ამბობს საქართველოს ჟურნალისტთა დამოუკიდებელი ასოციაციის პრეზიდენტი ზვიად ფოჩხუა.

წიგნის პრეზენტაციის შემდეგ შეხვედრა კითხვა-პასუხის რეჟიმში წარიმართა. ჟურნალისტებმა იმ პრობლემებზე ისაუბრეს, რასაც მუშაობის პროცესში აწყდებიან. მათ შორის: საჯარო ინფორმაციის ხელმისაწვდომობა, ღია და დახურული უწყებები, პროფესიულ საქმიანობაში ხელისშეშლა, ცენტრალიზებული უწყებებიდან ინფორმაციის დროულად მიღების სირთულე და ა.შ.

დიდი დრო დაეთმო მედიის წინაშე დღეს არსებულ გამოწვევებს, როგორიცაა მედიის ბიზნესად ქცევა, რეკლამა რეგიონულ მედიაში, ციფრულ მაუწყებლობაზე გადასვლის სირთულეები და ა.შ.

ზვიად ფოჩხუა ამბობს, რომ მესხეთი გამონაკლისი არ არის, საქართველოს თითქმის ყველა რეგიონში მსგავსი ვითარებაა. თუმცა, მცირე განსხვავებები მაინც არის, მაგალითად, არის რეგიონები, სადაც შედარებით მოგვარებული აქვს მედიას დისტრიბუციისა და რეკლამის მოზიდვის პრობლემები; ასევე, არის რეგიონები, სადაც ჟურნალისტები უფრო აქტიურად იცავენ თავიანთ უფლებებს, თუნდაც, ინფორმაციის მიღებისას.

ფოჩხუას განმარტებით, მსგავსი შეხვედრა თითქმის ყველა რეგიონში გაიმართა. დისკუსიების მიზანი რეგიონებში მომუშავე ჟურნალისტების დახმარების მიზნით მათი პრობლემების გაცნობაა. ორგანიზაცია გეგმავს რეგიონებიდან მიღებული ინფორმაცია თავის ანგარიშში ასახოს და მოამზადოს რეკომედაციები, ჟურნალისტების მუშაობის გასაადვილებლად.

[მანანა სარაშვილი, ახალციხე]