ახალციხეში საარჩევნო მედიაცენტრი გაიხსნა

დღეიდან, დეკემბრის ჩათვლით საარჩევნო მედიაცენტრი, კვირის გარდა, ყოველ დღე იმუშავებს.

აქ მოქალაქეებს, მაჟორიტარობის კანდიდატებს, არასამთავრობო ორგანიზაციებს , ჟურნალისტებსა თუ პოლიტიკურ პარტიებს საშუალება ექნებათ გამართონ დისკუსიები და მოაწყონ პრესკონფერენციები. ასევე, საარჩევნო სუბიექტები შეძლებენ თავიანთი საარჩევნო პროგრამები წარადგინონ.

ყველა აქტივობა, დემოკრატიული ჩართულობის ცენტრის კოორდინატორებთან შეთანხმებით შედგება, გარდა ამისა, არჩევნების დღეს მედიაცენტრით სარგებლობა და ყველა პოლიტიკურ ძალასთან კონტაქტი შეეძლებათ ჟურნალისტებს. აქ იმუშავებენ სადამკვირვებლო მისიები, რომლებიც საარჩევნო პროცსს მონიტორინგს გაუწევენ და მისი მიმდინარეობის შესახებ საზოგადოებას ინფორმაციას მიაწვდიან.

არჩევნების დღეს, მედია ცენტრი საარჩევნო უბნების გახსნამდე, ერთი საათით ადრე დაიწყებს მუშაობას. იგი აღჭურვილი იქნება ლაივსტრიმების განსახორციელებლად საჭირო შესაბამისი ტექნიკით.

საარჩევნო მედიაცენტრის პრეზენტაცია, დემოკრატიული ჩართულობის ცენტრის ახალციხის კოორდინატორის მოადგილემ მზია თამარაშვილმა გამართა. შეხვედრას მედიის, ადგილობრივი თვითამრთველობისა და პოლიტიკური პარტიების წარმომადგენლები ესწრებოდნენ.
„იმედი მაქვს, რომ აქ ხელის გადაგრეხვის პრინციპი არ იქნება და ყველა საარჩევნო სუბიექტი თანაბრად შევძლებთ ჩვენი პოზიციის ჩამოყალიბებას“, - განაცხადა შეხვედრაზე „პატრიოტთა ალიანსის“ მაჟორიტარობის კანდიდატმა ახალციხე-ადიგენის საარჩევნო ოლქში გოდერძი კუბლაშვილმა.

კუბლაშვილისგან განსხვავებით, „გაერთიანებული დემოკრატიული მოძრაობის“ რეგიონული კოორდინატორი ჯიმშერ გოგოლაური ეჭვობს, რომ დისკუსიის დროს სხვადსხვა კანდიდატები ოპონირებაზე უარს იტყვიან და შესაძლოა დებატები ვერც შედგეს: „მგონია, რომ ზოგიერთი კანდიდატი არ მოვა სადებატოდ, რადგან სათქმელი არაფერი ექნებათ, იმედია მაგ დეტალებს მედია აქტიურად გააშუქებს“.

წინასაარჩევნოდ მედიაცენტრთან თანამშრომლობას და ამ გზით ჟურნალისტებთან აქტიურ თანამშრომლობას აპირებს პარტია “სახელმწიფო ხალხისთვის“.

„ეს ცენტრი არის ნეიტრალური ზონა, სადაც პოლიტიკურ პარტიებს შესაძლებლობა ეძლევათ ჩამოყალიბდნენ და თავიანთი ხედვა გაუზიარონ მოსახლეობას”, - ამბობს „სახელმწიფო ხალხისთვის“ წარმომადგენელი ედვარდ კიკნაძე.

ახალციხის გარდა საარჩევნო მედია ცენტრი, საქართველოს ყველა თვითმართველ ქალაქში გაიხსნა, რომლის ფინანსურ მხარდაჭერას ამერიკის შეერთებული შტატების საერთაშორისო განვითარების სააგენტო (USAID) სამოქალაქო საზოგადოების განვითარებისა და მოქალაქეთა ჩართულობის პროექტის (ACCESS) ფარგლებში უზრუნველყოფს.

[ლუბა გიორგაძე, ახალციხე]