ორ დღეში განხილული აქტუალური თემები

სემინარი ახალციხესა და ბორჯომში მოქმედი მედია საშუალებების, ასევე არასამთავრობო სექტორის წარმომადგენლებისა და სტუდენტებისთვის გაიმართა.

- 'თემები, რომლის შესახებაც ვისაუბრეთ ორი დღის განმავლობაში განსაკუთრებით საინტერესო ჟურნალისტებისთვისაა, რადგან მათ ამ საკითხებზე მუშაობა ხშირად უწევთ’, - ამბობს გაეროს ადამიანის უფლებათა უმაღლესი კომისრის ოფისის ეროვნული პროგრამის კორდინატორი საქართველოში ეკატერინე ქრისტესაშვილი.

სემინარი გათავისუფლებული პოლიტპატიმრების თემით დაიწყო.

- ’პირველად მოხდა საქართველოს ისტორიაში, რომ პარლამენტმა თავად აღიარა პოლიტპატიმრების არსებობა, ამიტომ ვფიქრობ, სემინარის მონაწილეებისთვის ამ საკითხების მოსმენა ძლიან მნიშვნელოვანია’, - აცხადებს არასამთავრობო ორგანიზაცია ’ადამიანის უფლებათა პრიორიტეტის’ წარმომადგენელი ლია მუხაშავრია.

თემებზე სიძულვილის ენა - ქსენოფობია და ადამიანის უფლებები, ასევე უფლება პირად ცხოვრებაზე და მედიის წინაშე არსებული გამოწვევები, მედია ექსპერტმა ზვიად ქორიძემ ისაუბრა.

- ’მიგვაჩნია, რომ ასეთი საკითხების გაცნობა სჭირდებათ ჟურნალისტებს, ამიტომ ვართ აქ, რომ გავაცნოთ ეს სიახლეები და მოვისმინოთ მათი მოსაზრებები’, - ამბობს ქორიძე.

გაზეთ ’მესხეთის უნივერსიტეტის’ ჟურნალისტი ლიკა ზაზაშვილის თქმით, სემინარზე განხილული ყველა თემა საინტერესო იყო: ”ისეთ საკითხებზე ვისაუბრეთ რაც მეტად აქტუალურია ამ ეტაპზე, ასევე საინტერესო იყო რეკომენდაციების მიღებაც”.

ორდღიანი შეხვედრა გაეროს ადამიანის უფლებათა უმაღლესი კომისრის ოფისის ორგანიზებით მოეწყო. სემინარი გუშინ, 9 მაისს დაიწყო და დღეს დასრულდა.

[ნუკა სტეფნაძე, ახალციხე]