მესხეთში მოღვაწე კათოლიკე მღვდლები ევროინტეგრაციის საკითხებს გაეცნენ

ევროპასთან ინტეგრაციისა და ადამიანის უფლებათა დაცვის საკითხებზე, ახალციხეში შეხვედრა დღეს, 26 ოქტომბერს გაიმართა. მას ორგანიზება ლევან მიქელაძის სახელობის ფონდმა გაუწია, რომელიც ახორციელებს პროექტს, სახელწოდებით ,,ასწავლე მაცნეს– ევროკავშირი, ადამინის უფლებები და ოჯახური ღირებულებები“.

შეხვედრას, სამცხე–ჯავახეთში მოღვაწე ლათინური და სომხური წესის კათოლიკე სასულიერო და საერო პირები დაესწრნენ.
შეხვედრა მიზნად საქართველო–ევროკავშირის თანამშრომლობაზე რელიგიური უმცირესობებისა და სასულიერო პირების ცნობიერების ამაღლებას ისახავდა.

შეხვედრის განმავლობაში, მონაწილეებმა, "ღრმა და ყოვლისმომცველი თავისუფალი სავაჭრო სივრცის შესახებ“ ხელშეკრულება და ის ვალდებულებები განიხილეს, რომლებიც საქართველოს რელიგიური უმცირესობების წინაშე აქვს აღებული.

„ევროპასთან ურთიერთობის საკითხები ჩვენთვის, როგორც მოქალაქეებისათვის, რა თქმა უნდა იყო საინტერესო. ჩვენ, როგორც საქართველოში უმცირესობის ჯგუფებზე პასუხისმგებლებს, უნდა გვახსოვდეს, რომ ჩვენი უფლებების მოთხოვნა და დაცვა არის კარგი მოქალაქეობის ერთ–ერთი პირველი ნიშანი“, – განმარტავს ხიზაბავრის ეკლესიის წინამძღვარი მამა აკაკი ჭელიძე.



გარდა ამისა, მონაწილეებმა ადამიანის უფლებათა ექსპერტთან ერთად, ევროპეიზაციის ჭრილში განიხილეს ის პრობლემები, რომლებიც საქართველოში არსებულ უმცირესობებს აწუხებს. გაეცნენ მათი სამართლებრივად მოგვარების გზებსა და ამ კუთხით, სხვა ქვეყნებში არსებულ გამოცდილებას.

"იყო კონკრეტულ პრობლემებზე საუბარი. შესაძლებელია თუ არა სასულიერო პირის მხრიდან რელიგიის სწავლება სკოლაში, როგორ გადავჭრათ სხვადასხვა რელიგიური ჯგუფისა და მიმდინარეობის მხირდან საკუთრების უფლებასთან დაკავშირებული პრობლემები, ასევე ვისაუბრეთ გამოხატვის თავისუფლებაზე საქართველოში თუკი ეს გამოხატვის თავისუფლება სხვის რელიგიურ გრძნობებს შეურაცხყოფს“, – განმარტავს ადამიანის უფლებათა ექსპერტი ქეთი აბაშიძე.

პროექტი “ასწავლე მაცნეს – ევროკავშირი, ადამიანის უფლებები და ოჯახური ღირებულებები“ ჰოლანდიის სამეფოს საელჩოს დაფინანსების ხორციელდება. მის ფარგლებში უმცირესობებისათვის კიდევ რამდენიმე შეხვედრა გაიმართება.

"საინტერსეო იყო, რომ უცხო ქვეყნების გამოცდილების გაზიარებით, ჩვენც შევძელით სხვადასხვა პრობლემის სიგნალიზირება და იმედი გვაქვს, რომ მეორე შეხვედრა, რომელიც ნოემბრის თვეში გაიმართება, კონკრეტულად აქცენტირებული იქნება ქართველი კათოლიკეების ადგილობრივი პრობლემებისაკენ“, – ამბობს მესხეთის დეკანოზი მამა ზურაბ კაკაჩიშვილი.



[თაკო ფეიქრიშვილი, ახალციხე]