‘ასწავლე მაცნეს’ – მორიგი შეხვედრა რელიგიურ უმცირესობებთან

ახალციხეში, 20 მარტს, სასტუმრო „ჯინო–ველნეს რაბათში“, პროექტის „ასწავლე მაცნეს“ ფარგლებში, ლევან მიქელაძის სახელობის ფონდმა, სამცხე–ჯავახეთის რელიგიურ უმცირესობებთან შეხვედრა გამართა.

შეხვედრის საკითხებს, რელიგიური უმცირესობებისათვის კანონმდებლობის, ქონებრივი პრობლემების, საქართველო–ევროკავშირის ასოცირების შეთანხმების ფარგლებში არსებული სოციალური საკითხების, ასევე უვიზო რეჟიმის შესახებ ინფორმაციის გაცნობა წარმოადგენდა.

„ჩვენი მიზანია, რელიგიურმა უმცირესობებმა გაიგონ ევროკავშირთან ურთიერთობებისას რა სარგებელი შეიძლება ნახონ. შეხვედრით ჩვენ გვინდა მათ ეს დეტალები გავაცნოთ, რადგან ხშირ შემთხვევაში ენობრივი მიზეზების გამო, ხელი არ მიუწვდებათ ინფორმაციაზე. ამასთან ერთად გავუზიარებთ სხვა ქვეყნის გამოცდილებებს თუ როგორ ხდება სხვასხვა ქონებრივი დავების გადაწყვეტა, ეს ეხება ეკლესიებს თუ ა.შ“, – გვითხრა „ლევან მიქელაძის სახელობის ფონდის“ აღმასრულებელმა დირექტორმა არჩილ გეგეშიძემ.

შეხვედრას სამცხე–ჯავახეთში მოღვაწე ლათინური და სომხური წესის კათოლიკე სასულიერო პირები, სომეხთა სამოციქულო ეკლესიის მღვდლები და მათი მრევლი დაესწრო. რაც შეეხება, სამცხე–ჯავახეთში მცხოვრებ მუსლიმებს, როგორც ორგანიზაციაში განმარტავენ, მუსლიმებისთვის შეხვედრა აჭარასა და ქვემო ქართლში ტარდება.

„ჩვენ გვაქვს გარკევეული პრობლემები, გვჭირდება მეტი ინფორმაცია ჩვენს უფლებებთან დაკავშირებით, რაშიც ამ შეხვედრაზე მიღებული ინფორმაცია ძალიან დაგვეხმარება“, – ამბობს ადიგენის კათოლიკური სამრევლოების წინამძღვარი მამა ზურაბ კაკაჩიშვილი.

პროექტის „ასწავლე მაცნეს“ ფარგლებში რელიგიურ უმცირესობებთან შეხვედრები სამცხე–ჯავახეთში, ქვემო ქართლში, აჭარასა და კახეთში მიმდინარეობს.

„ლევან მიქელაძის სახელობის ფონდი“ პროექტს ნიდერლანდების სამეფოს საელჩოს ფინანსური მხარდაჭერით 2017 წლიდან ახორცილებს. პროექტის სამიზნე ჯგუფები არიან რელიგიური უმცირესობების წარმომადგენლები საქართველოში - მუსლიმი, კათოლიკე და სომხური სამოციქულო ეკლესიის სასულიერო პირები და მათი მრევლი. პროექტის ფარგლებში ჩატარდება სასწავლო შეხვედრები ტოლერანტობაზე, რელიგიის თავისუფლებასა და ადამიანის უფლებებზე.

[ლუბა გიორგაძე, ახალციხე]