რელიგიური თავისუფლების შესახებ, ახალციხეში შეხვედრა, ადამიანის უფლებების სწავლებისა და მონიტორინგის ცენტრის (EMC) ორგანიზებით გაიმართა. შეხვედრის მიზანი რელიგიური უფლებების შესახებ, სამცხე–ჯავახეთში მცხოვრები სხვადასხვა აღმსარებლობის ადამიანების ინფორმირება იყო.
გარდა ამისა, მონაწილეებმა დისკრიმინაციული შემთხვევები ერთობლივად განიხილეს. საუბარი შეეხო სახელმწიფოს მხრიდან რელიგიური ორგანიზაციების დაფინანსების საკითხს, კავშირს სახელმწიფოსა და რელიგიურ უმრავლესობას შორის და უმცირესობაში მოქცეულ იმ კონფესიებს, რომელთა დაფინანსებაზეც სახელმწიფო უარს ამბობს.
ორგანიზატორების თქმით, სახელმწიფო ხშირად იყენებს ისეთ ინსტრუმენტებსა და მიდგომებს, რომლებიც ადამიანის უფლებებიდან არ გამომდინარეობს, რითიც თვითონვე უწყობს ხელს მარგინალიზებას.
"ჩვენი მიზანია, რელიგიური ორგანიზაციების წარმომადგენლებს დავანახოთ თუ რა ძირითადი გამოწვევების წინაშე დგანან რელიგიის თავისუფლების კუთხით, სად არის ხარვეზები, რომელიც დისკრიმინაციას ან სეკულარიზმის კრიზისს იწვევს ქვეყანაში. ძალიან სპეციფიკური და რთულია რელიგიის თავისუფლების საკითხებზე მუშაობა, მაგრამ ჩვენთვის მნიშვნელოვანია, რომ ეს ცოდნა გააჩნდეთ რელიგიური ორგანიზაციებს, რომ საკუთარ პოზიციონირებაში, სახელმწიფოსთან კომუნიკაციაში ეს ცოდნა გამოიყენონ და ისინი არ დარჩნენ დაუცველები“, – განმარტავს EMC–ის სამოქალაქო და პოლიტიკურ უფლებათა პროგრამის დირექტორი თამთა მიქელაძე.
შეხვედრას ესწრებოდნენ სამცხე–ჯავახეთში მცხოვრები რელიგიური უმცირესობების წარმომადგენლები: მუსლიმური თემიდან, კათოლიკური და სომხური სამოციქულო ეკლესიებიდან.
მათ რელიგიური უფლებების დარღვევის რამდენიმე მაგალითზე ისაუბრეს: ჭელაში, მოხესა და ადიგენში ორი სარწმუნოების ადამიანების, მუსლიმებისა და მართლმადიდებლების დაპირისპირების, ასევე საკულტო ნაგებობების შეურაცხყოფისა და სადავო შენობების შესახებ. გარდა ამისა, საუბარი შეეხო იმ ხუთ ტაძარს, რომელთა დაბრუნებასაც კათოლიკე მრევლი უმრავლესობისგან მოითხოვს.
"საუბრის გარეშე, ალბათ, რელიგიურ თემებში არსებულ პრობლემებს არ ეშველება. მე ვფიქრობ, ყველა რელიგია არის გზა, მიმართული ღვთისკენ. რწმენა ინდივიდუალური რამეა, რომელიც უხილავის დაჯერებას გულისხმობს, ამიტომ თუ გინდა უკეთ წარმოაჩინო შენი სარწმუნოება და ანახო სხვებს, რომ ის ჭეშმარიტია, უნდა მოიქცე სიყვარულით და არა ძალადობითა და შეურაცხყოფით“, – ამბობს სოფელ მოხის მკვიდრი თამაზ ბერიძე.
რელიგიური თავისუფლების შესახებ, ადამიანის უფლებების სწავლებისა და მონიტორინგის ცენტრი (EMC) 2012 წლიდან მუშაობს. მათი საქმიანობა ძირითადად კვლევითია. ორგანიზაცია რელიგიურ უმცირესობებს უფასო იურიდიულ დახმარებას უწევს. ამ დროისათვის, ისინი რამდენიმე რელიგიურ თემატიკაზე სამართლებრივად დავობენ: მზადდება განაცხადი ადამიანის უფლებათა ევროპულ სასამართლოში წარსადგენად მოხეში, მუსლიმების ცემის ფაქტზე, ასევე ქობულეთში, ღორის თავის საკულტო ნაგებობაზე გაკვრის შესახებ.
სასამართლომ დააკმაყოფილმა EMC–ს სარჩელი ქალაქ რუსთავში კათოლიკური ეკლესიის მშენებლობის ნებართვაზე, რომელსაც ადგილობრივი მერია არ გასცემდა.
ორგანიზაცია იცავს სახარების რწმენის ეკლესიის უფლებებს, რომელმაც რელიგიური ორგანიზაციების სახელმწიფო დაფინანსების საკითხზე, საკონსტიტუციო სარჩელი შეიტანა.
რელიგიური თავისუფლების შესახებ შეხვედრების გამართვას ადამიანის უფლებებისა და სწავლების ცენტრი ქვეყნის სხვადასხვა რეგიონში გეგმავს.
[თაკო ფეიქრიშვილი, ახალციხე]