სამცხე–ჯავახეთში სამი ოლქიდან ორში არჩევნები „ქართულმა ოცნებამ“ მოიგო. ახალციხე–ადიგენის ოლქში კი მმართველი პარტიის, როგორც მაჟორიტარობის, ასევე მერობის კანდიდატებმა „ნაციონალებთან“ შედარებით ხმების ნაკლები ოდენობა მიიღეს. ამიტომ „ქართული ოცნებისა“ და „ნაციონალური მოძრაობის“ კანდიდატები ამომრჩეველთა ხმების მისაღებად მეორე ტურში იბრძოლებენ.
„პირველივე ტურში გამარჯვებას ველოდი, მაგრამ ეს გამარჯვება თითქმის მოპოვებული მაქვს, ამას მხოლოდ იურიდიულად გაფორმება სჭირდება. მადლობა ყველას ვინც მხარი დამიჭირა, ან არ დამიჭირა“, – ამბობს „ნაციონალური მოძრაობის“ დეპუტატობის კანდიდატი ვაჟა ჩიტაშვილი, რომელმაც შედეგებით „ქართული ოცნების“ კანდიდატს გიორგი კოპაძეს პირველი ტური მოუგო.
ჩიტაშვილის თქმით, მიუხედავად იმისა, რომ სახელისუფლებო რესურსი იქნა გამოყენებული, „ნაციონალურმა მოძრაობამ“ მაინც დამაჯერებელი გამარჯვება მოიპოვა, ამიტომ დარწმუნებულია, რომ მეორე ტურშიც გაიმარჯვებს.
„რა უნდა შეიცვალოს ამ ორი კვირის განმავლობაში?! ხალხმა ხმა რომ არ მომცეს, მაშინ კაცი უნდა მოვკლა და ამას ხომარ გავაკეთებ?! 53 წლის ვარ, მათ შეაფასეს ჩემი განმვლილი ცხოვრება და არჩევანი ამის მიხედვით გააკეთეს. ვფიქრობ, რომ მეორე ტურში უფრო მეტი მხარდაჭერა მექნება“, – აცხადებს ჩიტაშვილი.
ჩიტაშვილთან დამარცხებული კოპაძე „სამხრეთის კარიბჭესთან“ მოუცლელობის გამო კომენტარს ვერ აკეთებს. „ქართული ოცნებიდან“ მერობის კანდიდატი ვლადიმერ ზედგინიძე კი კოპაძის დამარცხებას ასე ხსნის: „ხმების მეტ ნაწილს ვერ მიიღებდა, რადგან გიორგი იყო ქალაქ ახალციხის მერი და არა ადიგენის. ეს ფაქტორი მუშაობს“.
შეკითხვაზე, მაშინ იმ ქალაქში რატომ წააგო არჩევნები, რომლის მერიც იყო, ზედგინიძე გვპასუხობს: „ბოლო ორი წლის განმავლობაში რაც გააკეთა კოპაძემ ამას დანახვა უნდა. თუნდაც რაბათში რამდენი რამ გააკეთა, ან ასფალტი რამდენ ქუჩაზე დაიგო. ამის მიხედვით უნდა შეეფასებინა ხალხს და არა პირადი ემოციით“.
„ასფალტი რომ დაყარა ბოლოს ეგ არ არის საქმის კეთება. პირადად მე უარყოფითად ვაფასებ კოპაძის ქმედებებს. იგივე რაბათში არაფერი გაუკეთებია და ხალხთანაც მეტი კომუნიკაცია უნდა ჰქონოდა“, – ასე ხსნის კოპაძის დამარცხებას საკუთარ ქალაქში „ბურჭულაძის“ პარტიის წარმომადგენელი ივანე გვარამაძე.
რაც შეეხება „ქართული ოცნებიდან“ ახალციხის მერობის კანდიდატის ვლადიმერ ზედგინიძის დამარცხებას, გვარამაძე ფიქრობს, რომ ზედგინიძეს დამოუკიდებელ კანდიდატად რომ ეყარა კენჭი, ბერად მეტ ხმას მიიღებდა.
არ ეთანხმება გვარამაძეს „თავისუფალი დემოკრატების“ მაჟორიტარი დეპუტატობის კანდიდატს შალვა გოგოლაძე. მას მიაჩნია, რომ ვერც ზედგინიძე და ვერც კოპაძე ვერ მიიღებდა ხმებს, ისინი რომ „ოცნების“ კანდიდატები არ ყოფილიყვნენ.
ზოგადად, ჩატარებული არჩევნების შედეგებთან დაკავშირებით კი სამართლებრივი თვალსაზრისით გოგოლაძეს პრეტენზია არ აქვს: „იყო უმნიშვნელო ექსცესები, მაგრამ ამას შედეგზე გავლენა არ მოუხდენია“.
პარტიისა და საკუთარ მარცხზე კი გოგოლაძე აცხადებს, რომ მიზეზები ისევ საკუთარ პარტიაში უნდა ეძებონ და წაგებას სხვას ვერ დააბრალებენ: „ალბათ სათქმელი ბოლომდე ვერ მივიტანეთ ამომრჩევლამდე. შესაძლოა, ადმინისტრაციული რესურსს თუ არ გამოიყენებდნენ სახელისუფლებო კანდიდატები და ხალხსაც არ დააშინებდნენ, ჩვენი მაჩვენებელი სამჯერ გაზრდილიყო, მაგრამ გამარჯვებისთვის ეს საკმარისი მაინც ვერ იქნებოდა“.
ნაკლები ცნობადობითა და მწირი ფინანსური რესურსით ხსნის მარცხს „ბურჯანაძე დემოკრატების“ მაჟორიტარობის კანდიდატი ბესიკ ხითარიშვილი: „ფინანსური სიმწირის გამო ვერ მოვახერხე სათანადო კამპანიის ჩატარება. მნიშვნელოვანია ისიც, რომ ადგილზე ვინც დიდი ხანია არ საქმიანობს, ნაკლებად იცნობენ. გადამწყვეტი, მაინც იყო ის, რომ ვერ მოვახერხეთ ხალხამდე მისვა ისე, როგორც ეს საჭირო იყო“.
ხითარიშვილი აცხადებს, რომ 8 ოქტომბრის არჩევნები რელურად უბნების გარეთ ჩატარდა: „ეს ალბათ არჩევნების მოგების ახალი მეთოდია საქართველოში. ის ვინც ჩვენ მხარს გვიჭერდა, ამბობს რომ არ მისულა არჩევნებზე“.
რაც შეეხება სახელისუფლებო პარტიის კანდიდატების მარცხს ახალციხე–ადიგენის ოლქში, ხითარიშვილი ამბობს: „ალბათ ეს მაინც პიროვნებიდან გამომდინარეა. რომელი პარტიის წარმომადგენლებსაც ჰქონდათ მაღალი რეიტინგი ისინი გავიდნენ“.
მეორე ტურში ხითარიშვილი ფიქრობს, რომ მეტი შანსი სახელისუფლებო კანდიდატებს აქვთ, ეს მხოლოდ იმიტომ რომ სახელისუფლებო რესურსია მათ მხარესა.
ივანე გვარამაძეს წინასწარ პროგნოზის გაკეთება უჭირს, თუმცა სურს რომ ხალხმა წინ [„ოცნებისკენ“] გაიხედოს და არა უკან [„ნაციონალებისკენ“].
უარყოფითად აფასებს „ნაციონალების“ გამარჯვებას „ეროვნული ფორუმის“ წარმომადგენელი ჯუმბერ ინასარიძეც: „მთელი საქართველო ერთ მხარეს დგას და რა გახდა ახალციხე?! ალბათ პირველ ტურში ვინც გაიმარჯვა, მეორეშიც გამარჯვებას ის მოიპოვებს“.
შალვა გოგოლაძე დარწმუებულია, რომ ხელისუფლება მათი კანდიდატების გასამარჯველბად ყველანაირ გზას გამოიყენებს: „ივანიშვილი ამბობს, რომ გასამარჯვებლად ყველაფერს გავაკეთებო და ვისაც ფული აქვს ის იგიებს“.
„პატრიოტთა ალიანსში“ არჩევნების შედეგებზე არ საუბრობენ. ამბობენ რომ პარტიას ჯერ დუმილი აქვს გამოცხადებული და შეფასებებს მოგივანებით გააკეთებენ.
[თამუნა უჩიძე, ახალციხე]
FM97.5 / LIVE
