ახალციხის მერობის დამარცხებული კანდიდატები შედეგებს აფასებენ

ახალციხეში ქალაქის მერის რიგგარეშე არჩევნების მეორე ტური „ნაციონალური მოძრაობისა“ და „ქართული ოცნების“ წარმომადგენლებს შორის გაიმართება. დამარცხებული კანდიდატების შეფასებები შედეგებთან და ასევე, მეორე ტურზე წინასწარ პროგნოზებთან დაკავშირებით სხვადასხვაგვარია.

ახალციხის მერობის კანდიდატი „ბურჭულაძის“ პარტიიდან ფიქრობს, რომ თუ კენჭს დამოუკიდებელ კანდიდატად იყრიდა, გამარჯვების მეტი შანსი ექნებოდა.

„მეტის მოლოდინი არც მქონდა, ვამბობდი, რომ მაქსიმუმ 10% მიგვეღო, რადგან თავიდანვე ცენტრალურ ოფისში არეულობა იყო, ხან ვინ შედიოდა და ხან ვინ გამოდიოდა. არ მჩვევია ღალატი, ბურჭულაძეს დიდ პატივს ვცემ და უბრალოდ იმიტომ ვიდექი მათ გვერდში ბოლომდე“, – ამბობს ივანე გვარამაძე.

შეკითხვაზე, რჩება თუ არა პარტიაში გვპასუხობს: „არ ვიცი, ვერ გეტყვით. საქართველოს გულისთვის სადაც ჩამთვლიან საჭიროდ, იქ ვიქნები. ჩემი ქვეყნის გულისთვის ყველგან წავალ“.

მერობის დამარცხებული კანდიდატი „პატრიოტთა ალიანსიდან“ ბესიკ ტაბატაძე კომენტარს არ აკეთებს. ამბობს, რომ მის პარტიას ერთი დღით დუმული აქვს გამოცხადებული და შედეგების შეფასებაზე ხვალ ისაუბრებს.

რაც შეეხება, კიდევ ერთ დამარცხებულ კანდიდატს, „ეროვნული ფორუმიდან“ ჯუმბერ ინასარიძეს აცხადბს, რომ ახალციხეში კანდიდატს პარტიის ნომრით ირჩევენ და მის პიროვნებას ყუარდღებას არ აქცევენ. შეკითხვაზე, მაშინ მისმა პარტიამ რატომ ვერ მიიღო ხმების დიდი ოდენობა, ინასარიძე გვპასუხობს: „ჩემ პარტიაში კანდიდატები ვინც იყვნენ ჩემზე მეტი ხმა არავის მიუღია, მხოლოდ ანი მიროტაძემ გამასწრო ცოტა მეტი ხმით“.

ქალაქის მერობის კანდიდატები ამბობენ, რომ „ნაციონალების“ ხელისუფლებაში ყოფნის დროს ჩატარებულ არჩევნებთან შედარებით, ამჯერად გარემო ბევრად თავისუფალი იყო,თუმცა, გამოიკვეთა დარღვევები და გადაცდომებიც.

რაც შეეხება მეორე ტურს, რომელშიც ერთმანეთს „ნაციონალური მოძრაობისა“ და „ქართული ოცნების“ მერობის კანდიდატები შეეჯიბრებიან, ჯუმბერ ინასარიძე ვარაუდობს, რომ „ნაციონალურმა მოძრაობამ“ საკმაო დამაჯერებლობით გაიმარჯვა და თუ ეს მაჩვენებელი შეინარჩუნეს, გამარჯვება ისევ მათ დარჩებათ. ზოგადად, ინასარიძე „ნაციონალების“ გამარჯვებას უარყოფიად აფასებს.

ამ თვალსაზრისით, მის პოზიციას იზიარებს ივანე გვარამაძეც: „წარსულში დაბრუნებას ისევ ჯობია, რომ წინ გადავდგათ ნაბიჯები. „ნაციონალების“ ჩადენილი საქმეები რომ დაგვავიწყდეს ძალიან დიდი დრო უნდა გავიდეს“.

შეგახსენებთ, 8 ოქტომბერს ახალციხის მერის რიგგარეშე არჩევნებში მონაწილეობას ხუთი კანდიდატი იღებდა. მათ შორის სამი დამარცხდა, ორი კი მეორე ტურში მონაწილეობას მიიღებს: „ქართული ოცნების“ მერობის კანდიდატმა ვლადიმერ ზედგინიძემ 36,99%, „ნაციონალური მოძრაობის“ მერობის კანდიდატმა ირაკლი ერეკლიშვილმა კი 45,98% მიიღო.

[თამუნა უჩიძე, ახალციხე]