30 ოქტომბერს პარლამენტის მაჟორიტარული არჩევნების მეორე ტური ტარდება

არჩევნების მეორე ტური ყველა იმ ოლქში დაინიშნა, სადაც კანდიდატმა ”საარჩევნო კოდექსით“ განსაზღვრული 50%-იანი ბარიერის გადალახვა ვერ შესლო.

8 ოქტომბრის არჩევნების შედეგების მიხედვით, მაჟორიტარულ ოლქებში ”ქართული ოცნების” მიერ წარდგენილი კანდიდატები ლიდერობენ, გარდა მარნეულის #36-ე, ხაშურის #43-ე და ახალციხის #44-ე ოლქებისა, სადაც მიღებული ხმების რაოდენობის მიხედვით, მმართველი პარტიის წარმომადგენლებს ოპოზიციური პარტიების კანდიდატებმა აჯობეს.

არჩევნების მეორე ტურში ერთმანეთის მთავარი კონკურენტი ”ქართული ოცნება” და ”ერთიანი ნაციონალური მოძრაობაა”. არჩევნების მეორე ტურში არჩეულად დეპუტატობის ის კანდიდატი ჩაითვლება, რომელიც მეტ ხმას მიიღებს.

#44 ახალციხე–ადიგენის ოლქში მაჟორიტარობის კანდიდატები არიან გიორგი კოპაძე, "ქართული ოცნებიდან" და ვაჟა ჩიტაშვილი "ერთიანი ნაციონალური მოძრაობიდან". არჩევნების პირველ ტურში ვაჟა ჩიტაშვილმა ამომრჩეველთა ხმების 44.07%, გიორგი კოპაძემ კი 39.65% მიიღო.

მაჟორიტარული არჩევნების მეორე ტური, N44 ახალციხე–ადიგენის ოლქში, 53 საარჩევნო უბანზე ჩატარდება. აქედან, 18 უბანი ადიგენშია, 35 კი ახალციხეში.

ცესკოს ცნობით, არჩევნების მეორე ტურები ჯამში 2 229 საარჩევნო უბანზე ჩატარდება, მათ შორის 9 გამონაკლის შემთხვევაში შექმნილი უბანია. არჩევნების მეორე ტურში მონაწილეობას 2 478 042 ადამიანი მიიღებს.

ცესკოს პრესსპიკერის, ანა მიქელაძის თქმით, ყველა უბანს გადაეცა ყველა საჭირო ინვენტარი და დოკუმენტაცია და ხვალ დილის 8:00 საათიდან ყველა უბანი მზად იქნება არჩევნების ჩატარებისთვის

ცენტრალურმა საარჩევნო კომისიამ 2016 წლის პარლამენტის არჩევნების საბოლოო შედეგების შემაჯამებელი ოქმი 18 ნოემბრის ჩათვლით (ამ დღეს ბოლო ვადაა) უნდა გამოსცეს. რაც შეეხება ახალარჩეული პარლამენტის შეკრების პირველ დღეს, პარლამენტის პირველი სხდომა 19 ნოემბრამდე უნდა გაიმართოს. ახალარჩეული პარლამენტის პირველი სხდომის დღეს პრეზიდენტი ნიშნავს. ასევე პრეზიდენტი ხსნის ახალარჩეული პარლამენტის პირველ სხდომას.

[sknews.ge]