”ტოლერანტმა” პირობით მსჯავრდებულთა პროექტის შედეგები შეაჯამა

სამუშაო შეხვედრაზე, რომელიც სასტუმრო ”კავკასიაში” დღეს დაიწყო და ხვალაც გაგრძელდება, სამცხე-ჯავახეთის რეგიონალურმა ასოციაცია ”ტოლერანტმა” საზოგადოებას ის შედეგები გააცნო, რასაც დაწყებიდან ამ დრომდე პირობით მსჯავრდებულთა პროექტის ფარგლებში მიაღწიეს.
პროექტს ”პირობითი მსჯავრდებულები (პრობაციონერი) ახალგაზრდების უფლებების დაცვა, მათი საზოგადოებაში რესოციალიზაციი ხელშეწყობა სამცხე-ჯავახეთში” ასოციაცია ტოლერანტი 2012 წლიდან ახორციელებს.

ასოციაცია ”ტოლერანტის” მონაცემებით, სამცხე-ჯავახეთში 460 პრობაციონერია. პროექტის ფარგლებში 60-მა გადამზადების კურსები გაიარა, 18 მათგანი კი უკვე სხვადასხვა სამსახურში დასაქმდა.

”ტოლერანტის” თავმჯდომარის ცირა მესხიშვილის განმარტებით, პრობაციონერებმა სხვადასხვა კურსები ახალციხის პროფესიულ სასწავლებელში გაიარეს.

”ტოლერანტის” სამუშაო შეხვედრას ევროკავშირის, პრობაციის ეროვნული სააგენტოსა და სამართალდამცავი ორგანოების წარმომადგენლები (პოლიცია და პროკურატურა) იურიდიული დახმარების სამსახური, მედია და სხვადასხვა არასამთავრობო ორგანიზაციები ესწრებოდნენ.

პროექტი ევროკავშირის დაფინანსებით ხორციელდება და მისი პარტნიორი ორგანიზაცია ”სამოქალაქო განათლების განვითარების მულტიეთნიკური რესურსცენტრის და არასაპატიმრო სასჯელთა აღსრულების ეროვნული სააგენტოა”.

[ნინო ბერიძე, ახალციხე]